Táýelsizdiktiń 30 jyldyǵy: Óskemende qazaq handaryna arnalǵan monýment salynady

ÓSKEMEN. QazAqparat – Óskemen qalasynda Táýelsizdiktiń 30 jyldyǵyna oraı aýqymdy monýment boı kótermek, dep habarlaıdy QazAqparat tilshisi.

Bul jaıly Shyǵys Qazaqstan oblysynyń ákimi Danıal Ahmetov Facebook jelisindegi jeke paraqshasynda jazdy.

«Búgin Óskemendegi eskertkishter qurylysynyń barysyn baqyladym. Onyń ishinde el Táýelsizdiginiń 30 jyldyǵyna arnalǵan aýqymdy monýment bar. Bul – birtutas memorıaldyq keshen, Qazaq handyǵynyń negizin qalaǵan Jánibek pen Kereı jáne qazaqtyń uly úsh bıi beınelengen biryńǵaı kompozıtsııa. Sondaı-aq munda el tarıhynyń negizgi kezeńderi men Qazaqstannyń Tuńǵysh Prezıdentiniń dáıeksózderi bar barelefter bolady», - deıdi ol.

Oblys ákiminiń aıtýynsha, monýment oblystaǵy ǵana emes, búkil Qazaqstandaǵy biregeı sáýlet qurylysyna aınalady. Onyń bıiktigi - 12,6 metrdi quramaq.

«16 jeltoqsanǵa deıin eskertkish salynyp bitedi. Keshenniń jalǵasy elimizdiń birinshi Qorǵanys mınıstri, ardager, Keńes Odaǵynyń Batyry, Halyq Qaharmany - Saǵadat Nurmaǵambetov atyndaǵy alleıa bolmaq. Men qazaqtyń osyndaı nar tulǵaly azamatymen jeke tanys boldym jáne ony qarapaıym, óz isiniń naǵyz sheberi retinde bilemin», - dedi Danıal Ahmetov.