Táýelsizdiktiń 30 jyldyǵy: Óskemende eńbegi eren qala turǵyndary marapattaldy

ÓSKEMEN. QazAqparat – Óskemen qalasynda Táýelsizdiktiń 30 jyldyǵy aıasynda eńbegi eren qala turǵyndaryn marapattaý rásimi ótti, dep habarlaıdy QazAqparat tilshisi.

Saltanatty sharaǵa ShQO ákiminiń birinshi orynbasary Almashan Smatlaev, qala ákimi Jaqsylyq Omar qatysty.

Óskemenniń damýyna eleýli úles qosqan azamattar «Qazaqstan Respýblıkasy Táýelsizdigine 30 jyl» merekelik medalimen marapattaldy.

Olardyń qatarynda qalalyq aqsaqaldar keńesiniń tóraǵasy Saılaýhan Aýhadıev, «№1 jol-qurylys basqarmasy» JShS dırektory Ilıa Elfımov, oblystyq «Halıfa Altaı» meshitiniń bas ımamy Ermek Muqataı, Óskemen jáne Semeı qalalarynyń epıskopy Amfılohıı, №46 orta mektebiniń dırektory Gýlfarıda Aýǵanbaeva, aýyr atletıkadan Qazaqstan ulttyq quramasynyń múshesi Denıs Ýlanov bar.

Sondaı-aq Almashan Smatlaev óskemendikterge Shyǵys Qazaqstan oblysy ákiminiń Qurmet gramotalaryn tabystady.

Jaqsylyq Omar óz sózinde barsha turǵyndardy kele jatqan merekemen quttyqtap, egemendiktiń otyz jylynda shahardyń túbegeıli ózgergenin atap ótti.

Halyq sany 400 myń adamǵa deıin ósip, jańa kórikti shaǵyn aýdandar paıda boldy.

Qalanyń damýyna qosqan erekshe úlesi úshin úsh adamǵa «Óskemen qalasynyń qurmetti azamaty» ataǵy berildi.

Olar – Ambýlatorııalyq ortalyq dırektorynyń damý jónindegi orynbasary Vladımır Kravtsov, «Úmit» balalar úıiniń dırektory Marııa Beısekanova jáne hokkeıden Qazaqstan Respýblıkasy ulttyq quramasynyń kapıtany Roman Starchenko.