Táýelsizdiktiń 30 jyldyǵy: Qyzylordada birqatar mádenı sharalar ótti

QYZYLORDA. QazAqparat -Qyzylorda oblysynda Táýelsizdiktiń 30 jyldyǵyn atap ótý maqsatynda kóptegen is-sharalar el nazaryna usynylýda, dep habarlaıdy QazAqparat tilshisi.

Osy maqsatta oblystyq is-sharalar jospary bekitilip, mádenı sharalar ótkizilýde. Atap aıtqanda, elimizdiń táýelsizdik jyldaryndaǵy jetistiktigin nasıhattaý maqsatynda «Tuǵyry bıik Táýelsizdik» atty respýblıkalyq aqyndar aıtysy ótkizildi.

Oǵan qosa Syr súleıi Kete Júsip Eshnııazulynyń 150 jyldyǵyna arnalǵan «Jyrlansyn, Táýelsizdik jyr bulaǵy» atty respýblıkalyq jyrshy-jyraýlar baıqaýy, Jyr alyby Jambyl Jabaevtyń 175 jyldyq mereıtoıyna arnalǵan «Álemge aıan jyrlary», «Tyńda, dala Jambyldy» atty dástúrli ánshiler men jyrshy-jyraýlardyń kontsertteri kópshilik qoshemetine ıe boldy.

«Tuńǵysh Prezıdent - Elbasy Nursultan Nazarbaevtyń «Uly dalanyń jeti qyry» maqalasynyń «Dala folklory men mýzykasynyń myń jyly» jobasyn júzege asyrý maqsatynda Syr boıyndaǵy ańyz áńgimeler, shejire, batyrlar jyry, qıssa-dastandardyń el aýzyndaǵy nusqalaryn jınaqtap, «Syr óńiriniń folklorlyq antologııasy» atty úsh tomdyq jınaǵyn shyǵarý josparlanǵan edi. Bıyl sol joba aıasynda antologııanyń birinshi tomy «Janqoja batyr» degen atpen jaryqqa shyqty», - dedi oblystyq mádenıet basqarmasynyń basshysy Asqarbek Esjanov.

Munan ózge, «Jasaı ber, Qazaq eli!» atty ánshi-kompozıtor, aqyn, Qazaqstannyń eńbek sińirgen qaıratkeri Elena Ábdihalyqovanyń ánderin oryndaýshylardyń respýblıkalyq konkýrsy ótkiziledi.

Al «Táýelsizdik tórindegi teatr» ataýymen Qazaqstannyń eńbek sińirgen qaıratkeri Ámir-Temir Huseınniń shyǵarmashylyq keshin ótkizý josparlanǵan.