Táýelsizdiktiń 30 jyldyǵy: Qazaqstandyq trıo Frantsııanyń birneshe qalasynda óner kórsetedi

NUR-SULTAN. QazAqparat – Qazaqstan Táýelsizdiginiń 30 jyldyǵyna oraı «FORTE TRIO» memlekettik trıosy Frantsııanyń eń bedeldi kontsert zaldarynda klassıkalyq mýzyka týyndylaryn qoıady, dep habarlaıdy QazAqparat tilshisi.

«FORTE TRIO» memlekettik trıosy Frantsııa qalalaryna gastroldik saparǵa shyqpaqshy. Qazaqstandyq ujym 15 jeltoqsanda Sortot sahnasynda, 16 jeltoqsanda Mıýlýzdegi Theatre de la sinne sahnasynda, 17 jeltoqsanda Nansıdegi Merııa saraıynda jáne 22 jeltoqsanda Lıondaǵy «Moliere» zalynda kontsert beredi.

«Eýropa tyńdarmandaryna qazaqstandyq kompozıtorlardyń shyǵarmalary men Batystyń klassıkalyq mýzykasynan tańdaýly týyndylar usynylady», - deıdi uıymdastyrýshylar.

«FORTE TRIO» pıanıst, Qazaqstannyń eńbek sińirgen qaıratkeri Tımýr Ormanshıevtiń jetekshiligimen óner kórsetetin eń tanymal qazaqstandyq kameralyq-aspaptyq ansambl bolyp sanalady. Mýzykanttar úshtigi QR Mádenıet jáne sport mınıstrligine qarasty Roza Baǵlanova atyndaǵy «Qazaqkontsert» memlekettik kontsert uıymnyń quramynda jumys isteıdi.