Táýelsizdiktiń 30 jyldyǵy: Elordadan bastalǵan marafon Oralda márege jetti

ORAL. QazAqparat – Táýelsizdiktiń 30 jyldyǵyna oraı «Nur-Sultan – Oral» uly marafony búgin Oralda Tuńǵysh Prezıdent alańynda márege jetti, dep habarlaıdy QazAqparat tilshisi.

Elordadan 26 qarasha kúni bastalǵan marafonǵa qatysqan 15 tájirıbeli jelaıaq Kókshetaý – Petropavl – Qostanaı – Aqtóbe arqyly jalpy uzyndyǵy 2021 shaqyrymdy segiz kúnde júgirip ótti.

Marafonnyń aıaqtalýyna arnalǵan saltanatty rásimge qatysqan BQO ákiminiń orynbasary Baqytjan Narymbetov óńir basshysy men Aq Jaıyq jurtshylyǵy atynan qatysýshylarǵa rızashylyǵyn jetkizdi.

«Búgin - oraldyqtar úshin erekshe kún. 15 ýltramarafonshy keshe bizdiń oblys aýmaǵyna kirip, Jympıty aýylynan, mine, Oralǵa deıin jetip otyr. 2021 shaqyrym júgirip ótý, bylaı qaraǵanda, qııal ǵajaıyp áńgime sekildi. Mine, osyny jelaıaqtarymyz shynaıy ómirge aınaldyra bildi. Eń bastysy, elimiz aman, jurtymyz tynysh bolsyn. Táýelsizdigimiz tuǵyrly bolsyn!», dedi B.Narymbetov.

Aıta keteıik, atalmysh marafondy «Astana jelaıaǵy» marafonshylar klýby» QB «Qazaqstan qurylysshylar odaǵy» respýblıkalyq zańdy tulǵalar birlestigimen birigip uıymdastyrdy.

Marafonnyń 469 shaqyrymǵa sozylǵan eń uzaq bóligi Qostanaı qalasy men Aqtóbe oblysy Áıteke bı aýdany Temirbek Júrgenov aýyly arasynda boldy. Al 148 shaqyrymdyq eń qysqa qashyqtyq BQO-nyń Syrym aýdany ortalyǵy Jympıty aýyly men Oral qalasy aralyǵy edi.

Osylaısha marafonshylar uly mártebeli Táýelsizdiktiń 30 jyldyǵy aıasynda otanshyldyq sezimdi baıytý, salaýatty ómir saltyn ornyqtyrý baǵytyndaǵy óz maqsatyna jetti.