Táýelsizdiktiń 30 jyldyǵy: Batys Qazaqstanda úzdik atbegiler marapattaldy

ORAL. QazAqparat – QR Táýelsizdiginiń 30 jyldyǵy qarsańynda BQO «Báıge federatsııasy» qoǵamdyq birlestigi uıymdastyrǵan «Altyn taǵa – 2021» marapattaý rásimi ótti, dep habarlaıdy QazAqparat tilshisi.

Saltanatty jıynda BQO dene shynyqtyrý jáne sport basqarmasynyń basshysy Qaımen Esendııarov ata-baba salt-dástúrin saqtap, ulttyq qundylyqtardy nasıhattap júrgen batysqazaqstandyq atbegilerdiń eńbegine toqtalyp, merekemen quttyqtady.

Birqatar atbegiler BQO ákimi men atalǵan basqarma atynan alǵyshatqa ıe boldy.

BQO «Báıge federatsııasynyń» prezıdenti Berik Esenǵalıev federatsııanyń atqarǵan jumystaryn, atbegilik dástúrdi saqtaýdaǵy tabys-jetistikterdi atap ótti.

Ardager atbegiler Qusaıyn Baqtııarov pen Mútáli Tóreǵalıevtiń ıyǵyna shapan jaýyp, qurmet kórsetti.

Sharaǵa qatysqan almatylyq atbegi, qoltýma jylqylardyń janashyry, «Qazaq Golden Streed» kompanııasynyń prezıdenti Ertileý Satybaldy batysqazaqstandyq atbegilerdiń aýyzbirshiligine rızashylyǵyn bildirip, osy jyly qoltýma jylqylardy tirkeýde belsendilik tanytqan azamattarǵa alǵyshattar tabys etti.

Ertileý Ońdasynuly bastaǵan top ótken jyldyń jeltoqsan aıynda Qazaqstanda týylǵan qoltýma jylqylardy esepke alyp, qujattaryn jasaý isin bastaǵan edi.

Osy bastamany qoldaǵan batysqazaqstandyq atbegiler de 100-den astam jylqyny tirketip, qujattaryn aldy.

Tuńǵysh ret ótken shara barysynda jyl boıǵy báıgelerde oza shapqan úzdikter marapattaldy. Sonymen, 2021 jyly «Taı jarysynyń úzdigi» bolyp «Qazyna» atty taımen top jarǵan bókeıordalyq Nurdáýlet Qalıaqparov, «Qunan jarysynyń úzdigi» retinde «Erkeqyz» atty sáıgúliktiń ıesi Merbol Meńdihanov, «Top báıgeniń úzdigi» dep «Baıraq» atty arǵymaqty baptaǵan Mırjas Tólegenov tanyldy.

Elbasy kýbogynda júlde alyp, el mereıin asqaqtatqan «Abadan» atty júıriktiń ıesi Jambyl Sátpaev «Alamannyń úzdigi» atandy.

Kaztalovtyq Ershat Omarǵalıev «Eń úzdik shabandoz», «Abadannyń» bapkeri Ernaz Sátpaev «Eń úzdik bapker» atalymdaryn ıelendi.

Aq Jaıyqta dúnıege kelgenmen, Arqada báıgege shaýyp júrgen, 2020 jylǵy Prezıdent kýbogynyń ıegeri, respýblıkalyq jarystardyń birneshe dúrkin jeńimpazy, Kaztalov aýdanynyń týmasy Mırlan Nurbolatovqa «Sheber shabandoz» ataǵy berildi.

Jyl boıǵy báıgelerdi uıymdastyrý, atbegilik damytý jumystaryna berilgen baǵa boıynsha federatsııanyń aýdandaǵy fılıaldary arasynan Kaztalov aýdany úzdik dep tanyldy.

BQO «Báıge federatsııasynyń» atqarýshy dırektory Satqalı Baızýlınniń aıtýynsha, sońǵy jyldary óńirde atbegilik óner qarqyndy damýda.

Quramynda 160-tan astam múshesi bar federatsııa aýdandarda ǵana emes, sonymen birge «Jaıyq júırigi» báıgesin respýblıkalyq deńgeıde uıymdastyrýdy qolǵa aldy.

Aldaǵy ýaqytta qoltýma jylqylardyń báıgesin ótkizý, shabandozdar mektebin ashý sekildi birqatar irgeli ister qolǵa alynbaq.

Eske sala keteıik, budan buryn atbegi Aqylbek Ishanovtyń atqa mingen balanyń armany asqaq, abyroıy bıik bolatyny jóninde aıtqanyn jazǵan edik.