Táýelsizdiktiń 30 jyldyǵy: Atyraýda «Túıe palýandar» anyqtaldy
Saıysta aýyr salmaqta baq synaǵan jeńimpazdardy oblys ákimi Maahmbet Dosmuhambetov marapattady.
«Sizder naǵyz bilekti, júrekti palýandardyń qýatty kúresi qandaı bolatynyn kórsettińizder. Qazaq halqynyń tól kúresiniń tarıhy tereńde. Ǵasyrlar boıy urpaqqa jalǵasyp kele jatqan ulttyq kúresimizdi damytý men qoldaý jastarymyzǵa da úlken rýh beredi. Jastardyń namysyn janyp, naǵyz er-azamat bolyp qalyptasýyna oń yqpal etedi», -dedi Mahambet Dosmuhambetov.
Ákimniń aıtýynsha, Táýelsizdiktiń arqasynda ulttyq sport túrleri jandanyp keledi. Oblysta sportshylardy qoldaýǵa aıryqsha kóńil bólinip otyr.
«Jyl saıyn sporttyq klýbtar men iri keshender sany artýda. Onda daıyndalatyn jas býynnyń qatary kóbeıe tústi. Táýelsizdiktiń 30 jylynda sportshylarymyz talaı márte halyqaralyq dodalarda kók baıraǵymyzdy kókte jelbiretti. Olardyń arasynda el tarıhynda ǵana emes, álem tarıhynda esimin altyn árippen jazdyrǵan jerlesterimiz bar. Máselen, Beıjiń Olımpıadasynyń qola júldegeri Arman Chılmanov men Rıo Olımpıadasynyń chempıony Nıdjat Rahımovty barsha qazaqstandyq maqtan etedi. Olardyń jeńisti jolyn jalǵastyratyn jastarǵa jaǵdaı jasaý jalǵasady», -dedi oblys ákimi Mahambet Dosmuhambetov.
Alyptardyń kúresin sport jankúıerleri bastan-aıaq áleýmettik jeliler arqyly tamashalady. Tartysty ótken saıys nátıjesinde qarsylastarynyń jaýyrynyn jerge tıgizgen Abylaı Amandyq birinshi oryndy ıelenip, jeńimpaz atandy. Al, Rýslan Іzǵalıev ekinshi, Shynbolat Hasanov úshinshi oryndy ıelendi. Jeńimpazdarǵa arnaıy syılyqtar men qarjylaı marapat berildi.
Eske sala ketelik, budan buryn Atyraýda el táýelsizdiginiń 30 jyldyǵyna oraı «OTAN Life» jobasy bastalǵan bolatyn.