Táýelsizdiktiń 30 jyldyǵy: Atyraýda kıkboksıngten el chempıonaty bastaldy

ATYRAÝ. QazAqparat – Atyraýda Táýelsizdiktiń 30 jyldyǵyna oraı kıkboksıngten el chempıonaty bastaldy, dep habarlaıdy QazAqparat.

Mádenıet jáne sport mınıstrli jáne Atyraý oblysy ákimdiginiń uıymdastyrýymen ótip jatqan jastar arasyndaǵy respýblıkalyq chempıonatta elimizdiń 17 óńirinen 200-ge jýyq sportshy baq synap jatyr.

Chempıonatqa qatysýshylarǵa oblys ákiminiń orynbasary Baqytgúl Hamenova men Kıkboksıng federatsııasynyń prezıdenti Tastanbek Esentaev sáttilik tiledi.

«Elimizdiń 3 qalasy men 14 oblysynan jalyndaǵan jastar qatysyp jatqan bul saıys el Táýelsizdiginiń 30 jyldyǵyna arnalyp otyr. Tartysty ári qyzyqty báseke jastardy salaýatty ómir saltyn ustanýǵa, sportpen júıeli aınalysatyn jastardyń qyzyǵýshylyǵyn oıatatyny daýsyz. Osyndaı saıystardyń nátıjesinde oblys turǵyndarynyń 34,2 paıyzy sportpen aınalysady» - dedi Baqytgúl Hamenova.

Eske sala ketelik, budan buryn Atyraýda el Táýelsizdiginiń 30 jyldyǵyna arnalǵan saıysta «Túıe palýandar» anyqtalǵanyn jazǵan edik.