Táýelsizdiktiń 30 jyldyǵy: «Altynqor» medıaportaly iske qosyldy

NUR-SULTAN. QazAqparat - «Altynqor» medıaportaly iske qosyldy, dep habarlaıdy QazAqparat.

Qazaqstan Táýelsizdiginiń 30 jyldyǵyna oraı QR Aqparat jáne qoǵamdyq damý mınıstrliginiń qoldaýymen «Qazaqstan» teleradıokorporatsııasynyń mádenı murany tsıfrlandyrý baǵytyndaǵy biregeı jobasy altynqor.com medıaportaly iske qosyldy.

Saıtta Qazaq televızııasy altyn qoryndaǵy 1930 jyldardan bergi vıdeo jáne aýdıomaterıaldar, sondaı-aq Táýelsizdiktiń jolyndaǵy aıtýly tarıhı oqıǵalar toptastyrylǵan.

Saıt qarapaıym kórermennen bólek, zertteýshi ǵalymdar úshin ashyq derekkóz retinde paıdalanýǵa múmkindik.

Medıaportal «Beıneqor», «Aýdıoqor», «Tulǵalar» jáne «Fotoarhıv» bólimderinen turady. Ár bólimde televızııa jáne radıo ardagerleriniń, qazaq ádebıeti men mádenıeti qaıratkerleriniń suhbattary, estelikteri, jeke arhıvi toptastyryldy.

Elbasy N.A.Nazarbaevtyń «Rýhanı jańǵyrý» bastamasyn júzege asyrý maqsatynda saıtqa batyrlar jyrynyń 50 nusqasy, 100 kúı, 100 ertegi nusqasy, «Syńsý», Besik jyry, «Jar-jar», «Betashar», «Jarapazan», Joqtaý» jınaqtaldy.

«Beıneqor» bóliminde S.Áshimbaev, Sh.Murtaza, S. Orazalın júrgizgen «Paryz ben qaryz», «Ult jáne sana», «Suhbat» baǵdarlamalarymen qatar, ár jyldardaǵy «Tamasha», «Halyq qazynasy», «Asyl mura», «Adam izdep júrmin», «Kelesi aıaldama», «Kesh jaryq», «Kúltóbe» syndy 800-den astam bólimnen turatyn 50 telehabarlar tsıkly, «Sovettik Qazaqstan» kınojýrnaly men «Qazaqtelefılm» óndiristik birlestiginiń jobalary bar.

«Tulǵalar» bóliminde K.Ázirbaev, M.Áýezov, S.Muqanov, Ǵ.Músirepov, Ǵ.Mustafın, Á.Tájibaev, Sh.Jıenqulova, K. Baıseıitova, Sh.Aımanov, Sh.Aıtmatov, Q.Myrza Áli syndy tulǵalardyń qatysýymen ár jyldary túsirilgen beınetoptamalar qamtyldy

«Aýdıoqor» bólimine 1954 jyldan bergi saqtalǵan M.Áýezov, S.Muqanov, І.Esenberlın, B.Soqpaqbaev, Ǵ.Músirepov syndy 100 ult qaıratkeriniń ár jyldary jazylyp alynǵan daýystary bar.

Búginde «Altyn qorda» 110 myńnan astam beıne jáne aýdıomaterıal bolsa, onyń qatary jyl saıyn 1000 materıalmen tolyqtyrylyp otyrady. Sondyqtan saıtty toltyrý isi de turaqty túrde jalǵasady.