Táýelsizdiktiń 30 jyldyǵy: Aqtaýdaǵy 10 kópqabatty úıdiń syrtyna mýral salynady

AQTAÝ. QazAqparat - Qazaqstan Táýelsizdiginiń 30 jyldyǵyna oraı qalanyń ortalyq joldarynyń boıynda ornalasqan 10 turǵyn úıdiń qabyrǵasyna mýral salynady, dep habarlaıdy QazAqparat tilshisi.

Bul týraly qoǵamdyq kommýnıkatsııa ortalyǵynda ótken brıfıngte Aqtaý qalasynyń ákimi Nurdáýlet Qılybaı málim etti.

Shahar basshysynyń aıtýynsha, joba qurylysy mekemeleriniń demeýshiligimen iske asady. Alǵashqy jumystar 10 mamyr kúni bastalady.

Budan bólek, el Táýelsizdiginiń mereıli merekesin toılaý maqsatynda birneshe joba iske aspaq.

«Jańa 40 shaǵyn aýdannan saıabaqtyń irge tasy qalanyp, qurylys jumystary bastalyp ketti. Demeýshiler qarajaty esebinen Aqtaý qalasynyń «Shyǵys-3» shaǵyn aýdany, № 8 jáne № 9 ónerkásiptik aımaqtyń qıylysyna «Shotan batyr» eskertkishin ornatý jáne «Aqtaý-Áýejaı» tas jolynyń boıyna kire-beris kesheniniń qurylysyn salý jobalary ázirlendi. Al, 20-sy shaǵynaýdaǵy aınalmaly jolǵa demeýshilik esebinen Táýelsizdiktiń 30 jyldyǵyna oraı Aqtaý qalasyna syı retinde «Saltanatty arkanyń» qurylysy bastaldy», - dedi Nurdáýlet Qılybaı.

Qala ákiminiń aıtýynsha, Aqtaýda 17 jáne 39 shaǵyn aýdandarda jańa meshitterdiń qurylysy boı kóterdi.

Qazir 17 shaǵynaýdan Beket ata meshiti ǵımaratynyń súrý jumystary júrgizilip jatyr.

Ornyna 1200 sharshy metr bolatyn jańa meshit turǵyzylmaq. Jańa meshit 2021 jyldyń II toqsanynda paıdalanýǵa beriledi dep kútilip otyr.

Al 39 shaǵynaýdandaǵy 500 adamǵa arnalǵan «Erjan Haziret» meshitiniń qurylysy 2021 jyldyń sońyna deıin aıaqtalýy tıis.

«El Táýelsizdiginiń 30 jyldyǵyna oraı 17 shaǵynaýdanda 3 qabatty «Oqýshylar saraıy» salynady. 6540 sharshy metrdi quraıtyn ǵımaratqa 1000-nan astam bala qabyldanatyn bolady», - dedi Nurdáýlet Qılybaı.