Táýelsizdiktiń 25 jyldyǵyna oraı Aqtóbede «Týǵan ólkem - tunǵan shejire» atty tarıhı-etnografııalyq kórme ótti

Qarǵaly aýdandyq tarıhı-ólketaný mýzeıiniń  ǵylymı qyzmetkeri Baǵdat Omarbekov:

- Qarǵaly aýdanynyń tarıhymen jáne osy óńirden shyǵatyn paıdaly qazbalardy tanystyrýdy maqsat etken kórmege Qarǵaly aýdanynyń tarıhyna qatysty 60-qa jýyq jádiger qoıyldy. Etnografııalyq bólimine jigittiń bes qarýyn ákeldik. Sondaı-aq bizder turǵyndardyń mýzeıge ákep syıǵa tartqan turmystyq buıymdaryn da ákelip, aqtóbelikterdiń nazaryna usynyp otyrmyz. Aıtpaqshy, kórmemizdi  Qytaıdan kelgen delegatsııa, atap aıtsaq, Qytaıdaǵy avtonomııalyq okrýgterdiń ókilderi tamashalady, - deıdi.

Sondaı-aq, ol Tuńǵysh Prezıdent atyndaǵy ortalyq saıabaqta ótetin Qarǵaly aýdany kúnderinde bir kıiz úıdi ulttyq buıymdarmen, tarıhı jádigerlermen jabdyqtaǵandaryn da jetkizdi.

 «ALTYN DІŃGEK - ÓZІM TÝǴAN BOSAǴAM»

Oblys ortalyǵyndaǵy Qarǵaly aýdany kúnderi barysynda S.Báıishev atyndaǵy oblystyq ǵylymı-ámbebap kitaphanada Qarǵaly aýdandyq ortalyqtandyrylǵan kitaphanasy «Altyn dińgek - ózim týǵan bosaǵam» atty kitap kórmesin usyndy.

Qarǵaly aýdanynyń 95 jyldyǵy, sondaı-aq, Badamsha aýylynyń qurylǵanyna 75 jyl el Táýelsizdiginiń 25 jyldyǵymen tuspa-tus kelip otyr.  Osyndaı ataýly datalarǵa arnalǵan oblys ortalyǵyndaǵy aýdan kúnderi aıasynda uıymdastyrylǵan kórme otansúıgishtikti nasıhattaıdy. Sebebi, munda Qarǵaly aýdanynyń tarıhy, osy óńirde týǵan azamattar týraly kitaptar jáne jas aqyndardyń tyrnaqaldy týyndylary engen jınaqtar  qoıylǵan. Atap aıtsaq, burynǵy Lenın aýdany, Aqaı aýylynda dúnıege kelgen ІІM-niń eńbek sińirgen qyzmetkeri, general-maıor Keńshilik Jumabaev týraly kitaptardy kózimiz shaldy. Qarǵaly aýdany, Qarabutaq poselkesiniń perzenti, qazir Astana qalasynda turyp jatqan Serik Sarınniń «Júrekten shyqqan marjandar» atty kitaby da osy jerde tur.

Keshti oblystyq mádenıet, muraǵattar jáne qujattama basqarmasynyń bas mamany Gúljan Mahanova sóz sóılep ashty.

- Bıyl el Táýelsizdiginiń 25 jyldyǵy qarsańynda oblys ákimi Berdibek Saparbaevtyń bastamasymen oblys ortalyǵynda ár aýdannyń kúnderi ótkizilip keledi. Ár apta saıyn ár aýdan ózderiniń tarıhyn, mádenıetin, ózderiniń áleýeti mol adamdary bar ekenin, qandaı shyǵarmashyl jastary ósip kele jatqandyǵyn, qandaı sharýashylyqtary baryn kórsetýine múmkindik alyp otyr. Bul - ıgi bastama. Eń qýanyshtysy sol, shyǵarmashyl adamdarmen osy kitaphanada kezdesemiz. Meniń qolymda Shapaǵat Amanjolov  pen Jomart Baımuqanovtyń óleńderi toptastyrylǵan «Qarǵaly qushaǵynda» atty kitap tur. Bul da jańaǵy sózimniń dáleli. Jastarǵa tabys tileımi, - dep, jastardyń bir óleńin kitaptan oqyp berdi.

Odan soń Qarǵaly aýdandyq ortalyq kitaphanasynyń kitaphanashysy Gúlbaný Kákenova el Táýelsizdiginiń 25 jyldyǵy qarsańynda kitaphana ujymy arnaıy ázirlegen «Táýelsizdik tańy» atty kitap kórmesin tanystyryp ótti. Munda ol Táýelsizdikke deıingi qazaq halqynyń júrip ótken jolyna toqtaldy, bir sózben aıtsaq, Qazaqstan tarıhyna sholý jasady.

Qarǵaly aýdanynyń barlyq kitaphanashylary biri án aıtyp, biri slaıd kórsetip, taǵy biri kitap kórmesiniń bólimderin tanystyryp, atsalysty.

Odan soń osy top «Júrekten - júrekke» qaıyrymdylyq aktsııasyn uıymdastyrýdy da umytpady. Aktsııa aıasynda «Úmit» balalar úıine barǵan kitaphanashylar orys halqynyń «Baýyrsaq» ertegisinen kórinis qoıyp, sábılerdiń kóńilin aýlaǵan. Sosyn sábılerge jemis-jıdekter taratyp, jazý-syzýǵa qajetti oqý quraldaryn syılady.

 SAıABAQ SÁNІ - ÓZGE ULT ÓKІLDERІNІŃ DASTARQANY

Senbiniń keshinde  «Týǵan jerim - nurly elim» atty Aqtóbedegi Qarǵaly aýdanynyń kúnderi Tuńǵysh Prezıdent atyndaǵy ortalyq saıabaqta sporttyq jáne mádenı-kópshilik sharalarmen túıindeldi.

Qarǵaly aýdanynda kóptegen etnostyń ókilderi tatý-tátti ómir súrip jatyr. Osyny erekshelep kórsetýdi kózdegen qarǵalylyqtar  bul kúni ártúrli ulttyń keıpine enipti. Munda 10-nan astam ult ókiliniń dastarqanyn baıqadyq. Ár ultty Qarǵalynyń ár aýyldyq okrýgteri men mektepteri usynyp tur.

№2 Badamsha orta mektebi dırektorynyń oqý isi jónindegi meńgerýshisi Baný Muhtar qazaq kıimi men dastarqanyn nasıhattap, sony jurt nazaryna usynyp turǵandaryn aıtty. Dastarqan basynan shoq samaýryndy da kórip qaldyq.

Biri káris, biri ýkraın, taǵy biri ázirbaıjan ultynyń dastarqanyn ázirlep, ulttyq kıimin kıp alypty.

Oblys ákiminiń orynbasary Muhtar Jumaǵazıev pen Aqtóbe qalasynyń ákimi Іlııas Ispanov bastaǵan top saıabaqtaǵy kórinister men kórmelerdi aralap, sporttyq jarystardy tamashalady. Olar kıiz úı ishindegi kórmelerdi aralap kórdi. Qosestek aýylyndaǵy «Altynbaq» sharýa qojalyǵynyń ónimderine erekshe yqylas bildirdi.

Sharýashylyq qojaıyny Erbol Sansyzbaev Eýropa elderine baryp, úsh aı bıznes-trenıngterden ótip kelgenin aıtady.

- Bul sharýany ákem Temirbek, aǵam Aıbek Sansyzbaevtar jáne jezdem Ómirbek Óskenbaev tórteýmiz qolǵa aldyq. Bıyl 5 gektarǵa qulpynaı ektik. Tańqýraı da bar.  Qulpynaıdyń biz ekken surpy qazan aılarynda da jemis beredi. Sonysymen erekshe. Mamyrdan bastap qar túskenge deıin aýyq-aýyq jemis beredi. Ónimi mol, iri. Qulpynaıdyń tórt-bes surpyn ektik. Atap aıtsam, kalıfornııa, ıtalııa albıony, aǵylshyn, taǵy basqa. Aıtpaqshy, biz bıyl Aýyl sharýashylyǵyn qoldaý qorynan úsh jylǵa 10 mıllıon teńge nesıe alyp, tehnıkalyq jabdyqtar satyp aldyq. Osyndaı iri ári jıi ónim berýi de sol tehnıkalardyń kómegi, - deıdi Erbol. Basshylar Erbolǵa sáttilik tilep, qulpynaıdan aýyz tıip jatty.

Aqtóbelikter bul kúni aýa raıynyń qubylyp turǵanyna qaramastan Qarǵaly aýdany ónerpazdary ázirlep ákelgen kontserttik baǵdarlamany tapjylmaı turyp tamashalady.