Táýelsizdiktiń 20 jyly ishinde qazaqstandyq 8 myń sábı shetel asty
ASTANA. 23 sáýir. QazAqparat - Sheteldikter asyrap alǵan qazaqstandyq sábıler sany 8 myńnan asyp otyr. Degenmen, sońǵy ýaqytta bul úderis tómendep keledi.
Búgin QR Parlamenti Májilisindegi Úkimet saǵatynda depýtattar saýalyna jaýap bergen QR Syrtqy ister mınıstri Erjan Qazyhanov osylaı málimdedi.
Toqtala ketetin jaıt, jıyn barysynda depýtat Nurtaı Sabılıanov sheteldikter asyrap alǵan qazaqstandyq balalardyń jaǵdaıyna alańdaýshylyq bildirip, olardyń quqyqtary men múddelerin qorǵaý boıynsha elshiliktiń atqaratyn qyzmeti jaıynda suraǵan bolatyn. «Biz shetelge bala asyraýǵa berýge qarsymyz. Degenmen, qazir ol jaqqa berilgen balalarymyzdyń quqyqtary tolyqqandy qorǵalýy kerek», - dedi depýtat.
«Sheteldikterdiń bala asyrap alýǵa keletin bolsaq, olardyń sany 8 myńǵa jýyq. ıAǵnı, Táýelsizdiktiń 20 jylynda osynsha balany sheteldikter asyrap aldy. Negizinen olardyń basym bóligi Batys Eýropa men AQSh-ta. Sózsiz, biz sheteldikter asyrap alǵan balalardy esepke alamyz. Alaıda eger Amerıkanyń jaǵrapııasyna salsaq, Reseıden sál ǵana kishkene osy elde Qazaqstannyń eki konsýldyq mekemesi, biri - Vashıngtonda, ekinshisi Nıý-Iorkte qyzmet etedi. Al asyrap alynǵan balalar shashyrańqy ornalasyp, ár jaqta turyp jatyr. Sondyqtan, bala asyrap alǵan otbasylardy aralap shyǵýǵa bir ǵana konsýldyń eshqandaı kúshi de, qarajaty da jetpeıdi. Degenmen, turaqty jumystar júrgizilýde», - deıdi óz kezeginde mınıstr E. Qazyhanov.
Mınıstrdiń aıtýynsha, oryn alyp jatatyn jazataıym oqıǵalardan, sátsizdikterden eshkim de saqtana almaıdy.
«Degenmen, bizdi qazaqstandyq sábılerdiń shetel asý úrdisiniń birtindep tómendep kele jatqany qýantady. Eger 1990 jylmen salystyrsaq, qazir bul úderis kúrt qysqardy. Qazaqstandyqtar ózderiniń jaǵdaılarynyń jaqsarýyna oraı, balany óz elimizde asyrap alýǵa kóbirek mán berip keledi», - dedi vedomstvo basshysy.
