Táýelsizdiktiń 20 jyldyǵyna oraı 36 myń aǵash egildi
MATY. 8 qyrkúıek. QazAqparat /Erbol Azanbek/ - Almaty oblysynyń Kerbulaq aýdanyndaǵy Basshı, Nurym aýyldarynda táýelsizdiktiń 20 jyldyǵyna oraı 36 myń aǵash egildi. Bul týraly «Týǵan tabıǵatty aıalaıyq» atty ǵylymı-tájirıbelik konferentsııa barysynda Kerbulaq aýdany ákiminiń orynbasary Bolysbaı Mombaev aıtty.
B.Mombaevtyń sózine qaraǵanda kógaldandyrýdy belgili kásipker, «Gúlstan» jýrnalynyń bas redaktory Gózel Quljabaıqyzy júzege asyrǵan. «Buǵan deıin Gózel Quljabaıqyzy táýelsizdiktiń 20 jyldyǵyna oraı ár aýyldy 20 myń aǵash egýge shaqyryp, bastama kótergen edi. Ózi bastamanyń basy retinde qatar turǵan qos aýylǵa 36 myń túp aǵash ekti»,- deıdi aýdan ákiminiń orynbasary.
Kásipker 4,5 mln. teńge jumsap aýyl mańyndaǵy 20 gektar jerge kókterek, alma, qaraǵaı syndy aǵashtardy ekken. Sondaı-aq Basshı aýylyndaǵy mekteptiń 3,5 gektarlyq aýlasyna 150 túrli ósimdikti jaıqaltyp qoıypty. Ári mektep oqýshylaryn sol ósimdikterdi kútip, baptaýǵa úıretken. Búginda atalǵan mekteptiń oqýshylary barlyq ósimdiktiń atyn jatqa aıtyp, ony kútý joldarymen tanystyra alady. «Qaraǵaı aýylǵa sán berse, kókterek otyn, alma jemis berse aýyl turǵyndaryna tabys kózi bolady. Mektep aýlasyndaǵy ósimdikter oqýshylardy ásemdikti súıýge, tabıǵatqa jaqyn bolýǵa úıretedi. Bárin qosa alǵanda aýyldy kórkeıtýdiń ekologııaǵa paıdasy zor», -deıdi G.Quljabaıqyzynyń ózi.
Búginde Almaty oblysynda G.Quljabaıqyzynyń bastamasyn qoldaýshylar kóbeıgen. Máselen, Raıymbek aýdany, Jalańash aýylyndaǵy oqý-óndiristik kombınatynyń dırektory Baqytgúl Uzaqova táýelsizdiktiń 20 jyldyǵyna tartý retinde 150 myń terek ekpek. «Osydan birneshe jyl buryn Qytaı Halyq Respýblıkasynan kók terektiń birneshe shybyǵyn ákelip, kútý nátıjesinde 150 myńǵa jetkizdik. Aldaǵy ýaqytta jer máselesi sheshilse táýelsizdiktiń 20 jyldyǵyna tartýymyz retinde aýyl mańyna egýdi oılap otyrmyz»,- deıdi ol.
