«Táýelsizdikti ornyqtyrý - basty maqsatymyz» - respýblıkalyq basylymdarǵa sholý

***
Keshe elimizdiń elordasynda QR Prezıdenti Nursultan Nazarbaevtyń qatysýymen dástúrli sıpatqa ıe bolǵan ІІІ Astana ekonomıkalyq forýmy óz jumysyn bastady. Oǵan álemniń ár shalǵaıyndaǵy jetpiske tarta elden úsh júzden astam delegat jınaldy. Osy mańyzdy sharaǵa nazar aýdarǵan «Egemen Qazaqstan» gazeti búgingi nómirinde «Jańa ıdeıalar alańy» degen taqyryppen kólemdi maqala basty. Gazettiń atap ótýinshe, Memleket basshysy óziniń Eýrazııalyq ıntegratsııalyq úderisterdiń senimdi jaqtaýshysy ekenin aıta kele, aldaǵy ýaqytta Eýrazııa qurlyǵynyń ıntegratsııalyq qaǵıdattary men baǵyttaryn negizdeıtin biryńǵaı qujattyń qajet bolatyndyǵyn atap kórsetip, osyǵan oraı nazar aýdarýǵa laıyqty jeti baǵyt jaıynda áńgime qozǵaǵan. «Olar - saýda men shekaralardyń ashyqtyǵyn damyta túsý, kólik jáne kommýnıkatsııalyq ınfraqurylymdardy damytý, ózara ınvestıtsııalar men tehnologııalar almasýyn yntalandyrý, kapıtaldyń jalpy rynogy, turaqty jáne jańa energııa kózderi, taza energetıka, adam resýrstaryn damytý men almasý, sonymen qatar, azyq-túlik qaýipsizdigin qamtamasyz etý arqyly ómir deńgeıin teńestirý máseleleri», dep jazady basylym.

ІІІ Astana ekonomıkalyq forým jumysy jaıynda keńirek «Alash aınasy», «Aıqyn», «Lıter», «Kazahstanskaıa pravda» basylymdarynan da oqı alasyzdar.

«Shildeniń 1-inde Elbasy Nursultan Nazarbaevtyń Qaraǵandy oblysyna jumys sapary bastaldy», dep jazady «Egemen Qazaqstan» gazeti. Memleket basshysy áýejaıdan birden Qazaqstan-Belarýs birlesken "QazBelAZ" JShS oryn tepken Qaraǵandy quıý-máshıne jasaý zaýytyna bet aldy. Kásiporyn tsehtaryn aralap, jumysymen tanysý kezinde istiń aıaq alysyn baıan etýshiler munda aýyr salmaqty ataqty júk kóliginiń birinshi kezeńde kúrdeli jóndeýden ótkiziletindigin, qosalqy bólshekteri jasalatyndyǵyn, sodan soń qurastyrylýy bastalatyndyǵyn aıtty. Jalpy alǵanda tolyq kúsh-qýatyna enýi aldaǵy úsh-tórt jylda aıaqtalýǵa tıis. Sonda jylyna 90 tonnalyq 5 jáne 45 tonnalyq 10 BelAZ qazba oryndarynan ken tasymaldaýǵa jóneltilip turady. Basylymnyń atap ótýinshe, Memleket basshysy búgin Temirtaýda ótetin qazaqstandyq tuńǵysh shoıyn qorytylýynyń 50 jyldyǵy qurmetine merekelik shoıyn alý rásimine, metallýrgterdiń saltanatty jınalysyna qatysyp, qalada jańadan boı kótergen nysandarmen tanysady.

Búgin Syrtqy ister mınıstrliginiń qyzmetkerleri kásibı merekeleri - Qazaqstan Respýblıkasynyń Dıplomatııalyq qyzmet kúnin atap ótedi. Osy oraıda «Egemen Qazaqstan» gazeti atalǵan vedomstvonyń basshysy Qanat Saýdabaevpen aradaǵy suhbatty oqyrman nazaryna usynyp otyr. Ekeýara áńgime barysynda basylymnyń barlyq saýaldaryna tuşymdy jaýap bergen ol, «Prezıdent N.Nazarbaev negizin qalaǵan syrtqy saıasat teńgermelilik pen pragmatızm qaǵıdattaryna súıenip, irgeles eldermen tarıhı qalyptasqan tatý kórshilestik pen dostyqty odan saıyn bekitti, ishki reformalarǵa qajetti qolaıly syrtqy jaǵdaılardy qamtamasyz etti. Ári zamanymyzdyń eń yqpaldy alys-jaqyn memleketterimen tereze teńestire otyryp, ózara tıimdi qatynastar qurýǵa múmkindikke qol jetkizdi», depti. Ekeýara áńgime «Táýelsizdikti ornyqtyrý - basty maqsatymyz» degen taqyryppen berilgen.

***

«Alash aınasy» gazetiniń búgingi nómiriniń «Dat» aıdarynda senator Janseıit Sársenqulovpen aradaǵy suhbat «Ákimniń, laýazymdy qyzmetkerdiń qalaı jer alǵany, saıajaı salyp, jeńil kólik mingeni aıqyn kórinip turady» degen taqyryppen jarııalanǵan. Basylym tilshisiniń barlyq saýaldaryna salmaqty jaýap bergen senator, «buryn bir mektepti bir jyl ishinde salyp bolý kózdelip, soǵan saı, bir jylǵa aqsha bólinetin. Biraq ol qurylystyń orny, jobasy degen túrli qajettilikterin daıyndap bolǵansha, jyldyń jartysyna baryp qalatyn. Sosyn, onyń jumysy bastalyp, ary qaraı bitkenshe ýaqyt jetpeı, qurylys kelesi jylǵa qalatyn jaǵdaılar boldy. Sóıtip, qarjy sol jyly ıgerilmeı qalady. Al kelesi jyly túrli sebeptermen joba qymbattap shyǵa keledi. Bıýdjetten taǵy da qosymsha aqsha suralady. Endi jańa bıýdjet jobasy bundaı keleńsizdikterge jol bermeıdi. Qurylys úsh jylǵa sozylsa da, jyl saıyn óziniń tıisti qarajaty qarastyrylyp qoıǵan. Berilgen aqshaǵa jobany aıaqtaý kerek. Olaı-bylaı bultaqtaýǵa múmkindik joq. Jaýapkershilik te kúshti» deıdi.

«QazAqparat» saıtynyń tóte jazý nusqasy shette júrgen 2 mıllıon qazaqty atajurtpen jalǵaıtyn altyn kópir bolyp otyr desek, artyq aıtqandyq emes. Ózge eldiń qol astynda júrse de, óz Otanynyń tynys-tirshiliginen, baǵyt-baǵdarynan sýsyndaǵan halyq eline degen erekshe sezim qalyptastyratyny anyq», dep jazady «Alash aınasy» gazeti. Bul jaıynda keńirek basylymnyń «Órkenıet» aıdaryndaǵy «Qytaıdaǵy qalyq qazaqty atajurtymen qaýyshtyrǵan aqparat» degen taqyryptan egjeı-tegjeıli oqı alasyzdar.

Keshe Astananyń temirjol vokzalynan QR Premer-Mınıstri Kárim Másimovtiń qatysýymen «Densaýlyq» emdeý-dıagnostıkalyq medıtsınalyq poıyzyn saltanatty túrde saparǵa shyǵaryp salý sharasy ótti. «Densaýlyq» poıyzy shalǵaıda ornalasqan stansylar men razezderde turatyn adamdarǵa qol jetimdi bilikti medıtsınalyq kómek kórsetý úshin shyǵaryldy. Mundaı poıyzdyń jasaqtalýyna «Qazaqstan temir joly» UK» AQ, QR Tótenshe jaǵdaılar mınıstrligi men Densaýlyq saqtaý mınıstrligi muryndyq bolyp otyr. Osyǵan oraı «Alash aınasy» gazetiniń juma kúngi nómirinde «Densaýlyq» poıyzy jolǵa shyqty» degen taqyryppen maqala jarııalandy.

***

Qazirgi tańda memlekettik jáne jalǵa beriletin páterler máselesi - eń ózekti taqyryptardyń biri. Oǵan «Nur Otan» HDP-nyń Qoǵamdyq qabyldaý bólmesine azamattar tarapynan túsken kóptegen shaǵymdar dálel bola alady. Olar óz shaǵymdarynda páterlerdi bólý barysyndaǵy zańsyzdyqtarǵa jol berilip otyrǵandyǵyn atap kórsetken. Osyǵan oraı keshe atalǵan partııanyń Ortalyq apparatynda Jemqorlyqpen kúres jónindegi respýblıkalyq qoǵamdyq keńestiń 16-shy otyrysy ótip, Astana, Almaty qalalary men Pavlodar, Ońtústik Qazaqstan oblystaryndaǵy memlekettik turǵyn úı qorynan bólingen páterlerdi taratý boıynsha taldaý nátıjeleri qaraldy. Atalǵan keńes otyrysy jaıynda tereńirek bilgińiz kelse «Aıqyn» gazetiniń búgingi nómirindegi «Baspana tóńiregindegi bassyzdyqtardy «Nur Otan» partııasy qatań synǵa aldy» degen maqalaǵa nazar salyńyz.

«Bekire tuqymdas baǵaly balyqty óndiretin «Atyraýbalyq» aktsıonerlik qoǵamyn memleket menshigine berý jumystary júrip jatyr», dep jazady «Aıqyn» gazeti. Basylymnyń atap ótýinshe, qıyn kezeńde jekeniń ýysyna ketken kásiporyn sońǵy jyldary tek shyǵyn ákelmese, paıda ákelýden qalǵan. Buryn jylyna 13 myń tonna balyq óndiretin mekemeniń kórsetkishi qazirgi ýaqytta 3,8 tonnaǵa deıin quldyrap ketken. Al onyń qaıta dáýirleýine kem degende 8-9 mıllıard teńge qarjy kerek.

***

«ІІІ Astana ekonomıkalyq forýmynyń aıasynda Memleket basshysy Nursultan Nazarbaev birqatar eki jaqty kezdesýler ótkizdi», dep jazady «Kazahstanskaıa pravda» gazeti QR Prezıdentiniń baspasóz qyzmetine silteme jasap.

Prezıdent N.Nazarbaev Eýropalyq ınvestıtsııalyq banktiń prezıdenti Fılıpp Maıshtadtty, BUU-nyń Ónerkásiptik damý jónindegi bas dırektory Kandeh ıÝmkellany, ekonomıka salasy boıynsha Nobel syılyǵynyń laýreattary Robert Mandellany jáne Fınn Kıdlandpen kezdesken. Máselen, Nobel syılyǵynyń laýreaty Robert Mandella «Men Qazaqstan jahandyq daǵdarysqa der kezinde ázirlene aldy dep esepteımin. Qazaqstan qolǵa alǵan sharalar barynsha durys boldy», dedi.