Táýelsizdikten beri qazaq tilinde oqytatyn mektepter 51,6 paıyzǵa artty

ASTANA. QazAqparat - Táýelsizdikten beri qazaq tilinde oqytatyn mektepter sany 51,6 paıyzǵa artty. Búgin Bilim jáne ǵylym mınıstrliginde ótken «Máńgilik Eldiń Máńgilik tili» taqyrybynda ótken dóńgelek ústel barysynda vıtse-mınıstr Esenǵazy Imanǵalıev osylaı málim etti.

Vıtse-mınıstrdiń aıtýynsha, sońǵy ýaqytta elimizde qazaq tilinde bilim beretin uıymdar jelisi úzdiksiz ósip otyr. Qazirgi kezde elimizdegi 8764 mektepke deıingi uıymnyń (3340 balabaqsha jáne 5424 shaǵyn ortalyq) 64,4 paıyzy, ıaǵnı 5644 uıym qazaq tilinde bilim beredi. Ondaǵy sábıler sany 2000 jyly barlyq tárbıelenýshilerdiń 14,8 paıyzyn qurasa, qazirgi kezde 41,1 paıyzǵa jetken.

«Qazaq tilinde oqytatyn mektepter jelisi táýelsizdik alǵannan bergi jyldarda 1051 uıymǵa nemese 51,6 paıyzǵa artty. Ondaǵy oqýshylar sany 626,2 myń balaǵa artyp, barlyq oqýshylardyń 65 paıyzdan astamyn qurady. Qalǵan oqýshylardyń 31,7 paıyzy - orys, 3,8 paıyzy - ózbek, uıǵyr, tájik jáne nemis tilderinde bilim alyp keledi. Sondaı-aq, ulty qazaq balalardyń 86,7 paıyzy jáne 34 084 basqa ult ókilderi qazaq tilinde bilim beretin mektepterde oqıdy», - deıdi vıtse-mınıstr.