Táýelsizdikke 30 jyl: Jetisaıda 1200 oryndyq jańa mektep paıdalanýǵa berildi

TÚRKІSTAN. QazAqparat - Túrkistan oblysy Jetisaı aýdanynda el Táýelsizdiginiń 30 jyldyǵy qarsańynda jańa mektep paıdalanýǵa berildi, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.

Zamanaýı úlgidegi №7 «Turan» mektep-gımnazııasy 1 200 orynǵa shaqtalǵan. Bilim uıasynyń ashylý saltanatyna aýdan ákimi Murat Kadyrbek ustazdar men oqýshylardy qýanyshtarymen quttyqtady.

Arnaıy rásimnen keıin qonaqtar synyp bólmelerin aralap, ondaǵy oqý quraldaryn kórdi. Qurylysy 2019 jyly bastalǵan bilim oshaǵy qysqy demalystan soń úshinshi toqsanda oqýshylardy bilim nárimen sýsyndatýǵa tolyqtaı daıyn.

Mekteptegi fızıka, hımııa, ınformatıka jáne mýltımedııalyq, lıngafondyq kabınetter sońǵy úlgidegi tehnologııalarmen jabdyqtalǵan. Sondaı-aq, zerthana kabınetteri men tigin sheberhanasy da bar. Jalpy oqýshylardyń sapaly bilim alýyna barlyq jaǵdaılar jasalǵan.