Táýelsizdikke 30 jyl: Shymkentte 112 otbasy jańa páterge ıe boldy

ShYMKENT. QazAqparat – QR Táýelsizdiginiń 30 jyldyǵyna oraı Shymkentte baspana kezeginde turǵan 112 otbasy jańa páterlerdiń kiltine ıe boldy. Olardyń barlyǵy – kópbalaly jáne áleýmettik jaǵynan álsiz toptaǵy otbasylar, dep habarlaıdy QazAqparat tilshisi.

QR Memlekettik hatshysy Qyrymbek Kósherbaev pen qala ákimi Murat Áıtenov shymkenttikterdi Táýelsizdik merekesimen quttyqtap, otbasylarǵa kópten kútken páter kiltterin tabystady.

«Qalanyń jańa damý baǵdary aıqyndaldy. Onyń bolashaǵynan úlken úmit kútemiz. Shymkentti jaıly qalaǵa aınaldyrýda úlken jumystar atqarylýda. Bıyl 1 mln sharshy metr alańy bar turǵyn úı paıdalanýǵa berilýde. Bul buryn-sońdy bolmaǵan kórsetkish. Halqymyzdyń sany artyp keledi. Turǵyndar sany eselep óse bersin», - dedi Qyrymbek Kósherbaev.

Qala ákimi halyqty turǵyn úımen qamtý salasynda aýqymdy jumystar atqarylyp jatqanyn jetkizdi.

Bıyl 676 azamat satyp alý quqyǵynsyz arendalyq pátermen qamtamasyz etilmek. Sonymen qatar, aǵymdaǵy jyly «Nurly jer» memlekettik baǵdarlamasynyń aıasynda 20 kópqabatty turǵyn úı kúrdeli jóndeýden ótti.

Memleket basshysy Qasym-Jomart Toqaevtyń tapsyrmasyna sáıkes, jumys isteıtin jastardy baspanamen qamtý jumysy da jalǵasýda.

Bıyl osyndaı 300 jasqa 5 jylǵa arendalyq páter tabys etildi. Aldaǵy ýaqytta taǵy 900 jasty pátermen qamtý josparlanyp otyr.