Táýelsizdikke - 30 jyl: Mańǵystaýda aýyl balalary velosıped teýip jarysty

AQTAÝ. QazAqparat - El Táýelsizdiginiń 30 jyldyǵy aıasynda Qaraqııa aýdanyndaǵy Bolashaq aýylynda 6-13 jas aralyǵyndaǵy mektep oqýshylary arasynda velojarys ótti. Bul týraly Qaraqııa aýdany ákimdiginiń baspasóz qyzmetine silteme jasap QazAqparat habarlaıdy.

Bolashaq aýylynyń ákimi Túzelbaı Saǵıevtiń málimetinshe, velojarys jas erekshelikterine qaraı 6-9 jas pen 10-13 jas aralyǵyndaǵy oqýshylar arasynda ótti.

Negizgi maqsat - salaýatty ómir saltyn nasıhattap, oqýshylardy shymyr bolýǵa tárbıeleý.

Jarys sońynda komanda jeńimpazdary anyqtalyp, qatysýshylarǵa dıplomdarmen arnaıy syılyq tabystaldy.

«Mektep oqýshylary arasynda ótken saıysqa demeýshilik kórsetken kásipkerlerge, uıymdastyrýshylar men barlyq atsalysqan azamattarǵa alǵysymdy bildiremin», - deıdi aýyl ákimi.

Bolashaq aýylynyń kásipkerleri jasóspirimder arasyndaǵy sporttyq sharalarǵa demeýshilik kórsetip júr.