Táýelsizdikke 30 jyl: Elordada «Aıbyn-2021» áskerı-patrıottyq jıyny bastaldy
Oǵan «Jas ulan» respýblıkalyq mektepterinen, S.Nurmaǵambetov atyndaǵy Qorǵanys mınıstrliginiń Áskerı kolledjinen, elimizdiń oblystary men qalalaryndaǵy Qarýly Kúshterdiń, basqa da áskerleri men áskerı quralymdarynyń áskerı-patrıottyq klýbtarynan quramynda 1100-den astam jasóspirimnen quralǵan 74 komanda qatysady.
Qarýly Kúshterdiń Ulttyq áskerı-patrıottyq ortalyǵynda ornalasqan front-keńse arqyly Premer-Mınıstrdiń orynbasary Eraly Toǵjanov pen Qorǵanys mınıstri general-leıtenant Murat Bektanov jıynǵa qatysýshylar aldynda sóz sóıledi.
Qorǵanys vedomstvosynyń basshysy Joǵarǵy Bas qolbasshy Qasym-Jomart Kemeluly Toqaevtyń «jastar – damý sımvoly, jarqyn bolashaqqa degen úmit kórinisi» degen sózderin mysalǵa keltirip, bul jańa býynǵa úlken jaýapkershilik júkteıtinin jetkizdi.
2021 jyl Qazaqstan Táýelsiz el bolǵanyna 30 jyl. Sizder – táýelsiz memlekettiń urpaǵysyzdar, elimizdiń basty ıgiligi, onyń kúshi men áleýetisizder, – dedi Qorǵanys mınıstri.
Qorǵanys mınıstri jıynǵa qatysýshylarǵa jarystarda sáttilik tiledi. Otan qorǵaýshylarymen bir qatarǵa turýǵa laıyqty bolyp, osy kúrdeli de qurmetti mamandyqty tańdap, óz ómirin áskermen baılanystyrǵysy keletin jastardyń talpynysy men nıetin atap ótti.
Búginde elimizdiń barlyq óńirlerinde súıikti kásibin oqytýǵa jáne qoıylǵan maqsattaryn iske asyrýǵa umtylatyn jastar úshin qajetti jaǵdalar jasalǵan. Jastardy áskerı-patrıottyq tárbıeleý jolyndaǵy aýqymdy jumysty oblys jáne qala ákimderi, bilim berý, jastar isi jónindegi basqarmalardyń basshylary júrgizedi.
Ashylý saltanatyna Tótenshe jaǵdaılar mınıstri general-maıor ıÝrıı Ilın, Іshki ister mınıstriniń orynbasary – Ulttyq ulannyń bas qolbasshysy general-leıtenant Rýslan Jaqsylyqov, tóraǵanyń orynbasary – Ulttyq qaýipsizdik komıteti Shekara qyzmetiniń dırektory general-leıtenant Darhan Dilmanov, Memlekettik kúzet qyzmeti bastyǵynyń orynbasary polkovnık Batyrbek Baıbosynov, Bilim jáne ǵylym mınıstrligi Mektepke deıingi jáne orta bilim komıteti tóraǵasynyń orynbasary Jomart Qarabaev, basqa da mınıstrlikter men vedomstvolardyń ókilderi qatysty.
Jıyn aıasynda áskerı-qoldanbaly sport túrlerinen jarystar, «Aıbyn daryny» zııatkerlik oıyny, «Aıbyn juldyzy» shyǵarmashylyq konkýrsy, «Smart sarbaz» konkýrsy ótedi. Onda jas qurastyrýshylardyń qolymen jasalǵan robottar jáne robottandyrylǵan júıelerdiń túrleri usynylady.
Bıylǵy baǵdarlamada jańa jarystar paıda boldy. Olar jas tilshiler arasyndaǵy «Jas sarbaz – jas tilshi» baıqaýy jáne toǵyzqumalaq ulttyq oıyny boıynsha onlaın-týrnıri. Alǵash ret turaqty túrde «Jas sarbaz Hab» kovorkıng-ortalyǵy iske qosylady. Onyń ishinde jıynnyń front-keńsesiniń, brıfıng zalynyń jáne «Jas sarbaz medıa» stýdııasynyń jumysy uıymdastyryldy.
Ótken jyldaǵydaı, barlyq jarystar men baıqaýlar qatysýshylardyń normatıvter men tapsyrmalardy oryndaý sátinen vıdeolardy júkteý arqyly mobıldi qosymsha boıynsha uıymdastyrylady.
«Aıbyn-2021» respýblıkalyq áskerı-patrıottyq jastar jıyny 30 qarashaǵa deıin jalǵasady. «Egemen Eldiń erteńi – men jas sarbaz» atty birinshi jas patrıottar forýmy aıasynda jıynnyń jabylý jáne jeńimpazdardy marapattaý rásimi ótedi.
