Táýelsizdikke 30 jyl: Astanada zııaly qaýym ókilderimen kezdesý ótti
B.Máken Nur-Sultan qalasy – Táýelsizdiktiń 30 jyldyǵynda tek saıası-áleýmettik, qarjylyq-ekonomıkalyq minberlerdiń emes, mádenıet pen ádebıettiń, óner men rýhanııattyń da mártebeli tuǵyryna aınalǵanyn atap ótti.
«Qoǵamdy rýhanı jańǵyrtyp, kemeldendirýde mádenıet pen ádebıettiń, óner men rýhanııattyń yqpaly zor ekeni anyq. Prezıdentimiz Qasym-Jomart Toqaev óziniń «Táýelsizdik bárinen qymbat» atty maqalasynda ótken otyz jyldyń ár on jylynda atqarylǵan isterge jeke-jeke toqtalyp, «Aldaǵy tórtinshi onjyldyqtyń bizge júkteıtin mindeti – qýatty eldiń ıesi jáne kemel halyq bolý. Bul jolda saıası-ekonomıkalyq reformalardy jáne sanany jańǵyrtý úderisin jalǵastyryp, zaman talabyna beıimdelgen ulttyń jańa bolmysyn qalyptastyrýymyz qajet» degen bolatyn. Memleket basshysy óz maqalasynda qazaq tilin damytý, ulttyq qundylyqtarymyzdy túletý, kıno ónerin órkendetý, saıası reformalar, bilim men ǵylym salasyn damytý, adam kapıtalynyń sapasyn arttyrý sııaqty asa mańyzdy máselelerge toqtaldy. Bul Elbasymyz Nursultan Ábishulynyń bastamasymen dúnıege kelgen «Mádenı mura», «Rýhanı jańǵyrý» baǵdarlamalarynyń jalǵasy dep baǵalaýǵa bolady», – dedi Baqtııar Máken.
Keıingi jyldary elordada mádenıet salasynda biraz jumystar atqaryldy. Atap aıtqanda, qalamyzdyń birqatar mektepteri men kóshelerine uly tulǵalardyń esimderi berildi. Mundaı ıgi jumystar aldaǵy ýaqytta da jalǵasa bermek.
«Byltyr Qalıbek Qýanyshbaev teatry jańa záýlim ǵımaratqa kóshti. Onyń ornynda jasóspirimderge arnalǵan jańa teatr paıda boldy. Jaqynda ǵana Nomad teatryna Halyq kaharmany Ázirbaıjan Mámbetovtyń esimi berildi. Bıyl jyr alyby Jambyl babamyzdyń 175 jyldyǵy. Soǵan oraı Qalıbek Qýanyshbaev teatrynda kórnekti tulǵanyń mereıtoıynyń ashylý saltanaty ótedi. Sonymen birge búgin aqıyq aqyn Muqaǵalı Maqataevtyń týǵanyna toqsan jyl tolyp otyr. Osy jyly áıgili balýan Qajymuqan atamyzdyń 150 jyldyǵy, zańger Salyq Zımanovtyń 100 jyldyǵy jáne ózge mereıtoılar bar. Olardy da tıisti deńgeıde atap ótemiz dep josparlap otyrmyz», – dedi ákim orynbasary.
Odan keıin belgili aqyn, Memlekettik syılyqtyń laýreaty Nesipbek Aıtuly, tarıhshy Búrkit Aıaǵan, fılologııa ǵylymdarynyń doktory Serik Negımov, aqyn Serikzat Dúısenǵazın, Qazaqstan Jazýshylar odaǵy Nur-Sultan qalalyq fılıalynyń dırektory, aqyn Dáýletkereı Kápuly, dástúrli ánshi Erlan Rysqalı sekildi birqatar azamat sóz alyp, qalanyń rýhanı-mádenı ómirin kórkeıtýge qatysty oı-pikirin aıtty. Astana rýhanııatynyń damýyna úles qosqan, qazir ómirde joq, elimizge tanymal keıbir azamattardyń esimine kóshe, mektep berý týraly sóz qozǵaldy. Qalalyq Іshki saıasat basqarmasynyń basshysy Dáýren Babamuratov óz salasynda atqarylǵan jumystarǵa toqtaldy.
Jıyndy qorytqan Baqtııar Máken aıtylǵan usynystyń bári eskeriletinin aıta kelip, basqosýdyń sońynda Muqaǵalı Maqataevtyń týǵan kúnine oraı aqıyq aqynnyń bir óleńin oqyp berdi.
