Táýelsizdikke 30 jyl: Almatyda iri ónerkásiptik nysan iske qosyldy

ALMATY. QazAqparat- Táýelsizdiktiń 30 jyldyǵyna oraı Almaty ákimi Baqytjan Saǵyntaev úlken dıametrli bolat dánekerlengen qubyrlar shyǵaratyn zaýytty iske qosý rásimine qatysty, dep habarlaıdy QazAqparat tilshisi.

Qala ákimi Baqytjan Saǵyntaev jumysshylar men zaýyt basshylyǵyn kele jatqan Táýelsizdik kúnimen quttyqtady, onyń 30 jyldyq mereıtoıy árbir qazaqstandyqtyń júregine qymbat.
Ol eki jyl buryn Indýstrıaldy aımaqtyń jumys qaǵıdattary ózgergenin eske saldy.
Jobalardy iske asyrý úshin kásipkerler men salalyq odaqtardyń basshylary kiretin qalanyń iskerlik keńesi irikteıdi jáne bekitedi.

«Osyndaı tásildemeniń arqasynda biz toqtap turǵan jobalardy joqqa shyǵardyq jáne perspektıvaly óndiristerdi iske asyrýǵa múmkindik berdik. Eń iri zaýyttardyń biriniń iske qosylýy jańa jumys oryndaryn ashýǵa jáne qala ekonomıkasyn nyǵaıtýǵa múmkindik berdi», - dedi Baqytjan Saǵyntaev.

Dıametri 355 mm-den 1420 mm-ge deıingi bolat dánekerlengen qubyrlardy óndirý jobasyn «Asia Steel Pipe Corporation» JShS júzege asyrdy.
Ónim munaı, gaz, sý jáne munaı ónimderin tasymaldaýǵa arnalǵan. Sonymen qatar qubyrlardy taý-ken, qurylys, hımııa ónerkásibi, energetıka salalarynda paıdalanýǵa bolady. Sondaı-aq, kásiporynda korrozııaǵa qarsy jabyndar óndirisi jolǵa qoıylǵan.
Jobanyń quny 33 mlrd teńge. Zaýytta 304 turaqty jumys orny ashyldy. Jobalyq qýattylyǵy – jylyna 100 myń tonna qubyr ónimi. Jobany júzege asyrý úshin Almaty Indýstrıaldy aımaǵynda 18,2 ga jer telimi bólindi.
Búginde jalpy somasy 112,7 mlrd teńgege, 2 957 jumys ornyn qurýmen 18 joba iske asyryldy.