Táýelsizdikke 30 jyl: Aqmola oblysynda belsendi jastar marapattaldy

KÓKShETAÝ. QazAqparat – Aqmola oblysynda Táýelsizdiktiń 30 jyldyǵyna arnalǵan «Jas ustaz - el bolashaǵy», «KDM - LIFE», «Uly tulǵalar jolymen» jastar arasyndaǵy onlaın - konkýrstardyń jeńimpazdary men júldegerlerin marapattaý rásimi ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Vedomstvonyń málimetinshe, sharalar jumys isteıtin, stýdent jáne oqýshy jastardyń belsendi azamattyq ustanymyn arttyrý, jastar qozǵalysyn damytý, qoǵamdyq sanada qazirgi zamanǵy tabysty jas qazaqstandyq ıdealyn qalyptastyrý maqsatynda ótkizildi.

«Saıystardyń árqaısysy eki kezeńnen turdy. Birinshi kezeńde qatysýshylar daıyndalǵan beınerolıkter men jobalardy usyndy, sodan keıin olardy áleýmettik jelilerde jarııalady. Ekinshi kezeńde qazylar alqasy múshelerine óz jumystarynyń tusaýkeserin ótkizdi», - deıdi uıymdastyrýshylar.

Barlyq týrlardyń qorytyndysy boıynsha, «Jas ustaz - el bolashaǵy» baıqaýynda Qosshy qalalyq №2 OM qazaq tili men ádebıeti pániniń muǵalimi Qýanysh Muqasheva birinshi orynǵa ıe boldy.

«Uly tulǵalar jolymen» baıqaýynda ádebıet jáne óner salasynda Málik Ǵabdýllın atyndaǵy «Azamattyq jáne patrıottyq úshin» atalymynda Abaı Myrzahmetov atyndaǵy Kókshetaý ýnıversıtetiniń aǵa oqytýshysy Rızzat Elýbaev jeńiske jetti.

Shoqan Ýálıhanov atyndaǵy «Etnografııa jáne folklor salasyndaǵy úzdik zertteýshi» atalymy boıynsha Shoqan Ýálıhanov atyndaǵy Kókshetaý ýnıversıtetiniń magıstri Esbolat Aıtken jeńimpaz atandy.

«KDM – LIFE» baıqaýynda birinshi oryn Kókshetaý qalasynyń joǵary tehnıkalyq kolledjiniń jastar isi jónindegi komıtetine berildi.

Baıqaý jeńimpazdary men júldegerleri aqshalaı sertıfıkattar men dıplomdarmen marapattaldy.

Aıta keteıik, Aqmola oblysynda 14-29 jas aralyǵyndaǵy 152 myńǵa jýyq jas azamat turady. El táýelsizdiginiń mereıtoılyq jylynda óńirde eki myńnan astam túrli jastar is-sharalary ótkizildi.