Táýelsizdik jyldarynyń ishinde Úkimet bir de bir zań jobasyn memlekettik tilde ázirlemegen - Májilis spıkeri
Májilis spıkeriniń aıtýynsha, zań jobalarynyń memlekettik jáne orys tilderindegi túpnusqalyǵynyń saqtalmaýy áli kúnge deıin úlken problema bolyp otyr. Bul rette Tóraǵa Úkimetke pysyqtaı túsý úshin keri qaıtarylǵan 13 zań jobasynyń 10-y osy sebepten oryn alǵanyn atap ótti. «Táýelsizdik jyldarynda 2,5 myńǵa jýyq zań qabyldandy. Biraq osy 23 jyldyń ishinde Úkimet bir de bir zań jobasynyń bastapqy mátinin memlekettik tilde ázirlemegen. Al depýtattar memlekettik tilde ázirlengen tek 2 zań jobasyna bastamashylyq jasaǵan. Elbasy aıtqanyndaı, bul máseleni shýlamaı, saıası dıskýssııaǵa aınaldyrmaı ár azamat úıde de, jumysynda da, qoǵamdyq oryndarda da qazaq tilinde sóıleýdi paryz retinde sanap, tilimizdiń kúndelikti qoldanýyna úlesin qosa otyryp júzege asyrǵan oryndy», - dedi Májilis spıkeri Qabıbolla Jaqypov. Bul rette palata tóraǵasy Parlamentte zań jobalary memlekettik tilde ázirlenip, qabyldansa, bul halyqtyń múddesinen shyǵýǵa qosqan zor úlesi bolatynyn alǵa tartty. Onyń paıymynsha, qazirge deıin zańdardyń bastapqy mátini orys tilinde jazylyp, sońynan qazaq tiline sapasyz aýdarylyp keledi. Al buǵan qatysty memlekettik tildi jetik meńgergen zańgerlerdiń, túrli sala mamandar tapshylyǵynyń azdyǵy aıtylady. «Degenmen, birqatar málimetterdi aıtaıyn: Bilim jáne ǵylym mınıstrliginiń derekterine qaraǵanda, 2013 jyly joǵary oqý oryndaryn qazaq tilinde bitirgen túlekter sany barlyq mamandyqtar boıynsha 85 myńnan astamdy quraǵan. Al 2014 jyly bulardyń sany 89 myńnan asyp tústi. Sonymen qosa, sońǵy 2 jylda qazaq tilinde 4 myńnan astam zańger joǵarý oqy oryndaryn bitirgen. Olardyń barlyǵy qaıda sonda? Memlekettik organdar bizdiń osyndaı resýrstarymyzdy nege paıdalanbaıdy? Bul rette depýtattyq korpýs tikeleı úlgi kórsete otyryp, memlekettik tilde zań jobalaryn ázirleýge kirisedi dep senemin. Bul qazaq tiliniń damýyna qosylǵan zor úles bolar edi», - dedi spıker Q. Jaqypov.
