Táýelsizdik jyldarynda Qazaqstan halqy 4 mln adamǵa kóbeıgen - konferentsııa
«Búgingi 10 jeltoqsan Qazaqstannyń Tuńǵysh Prezıdenti Nursultan Ábishulynyń tikeleı halyq saılaýy arqyly bılikke kelip, ant bergen kúnimen sáıkes kelip otyr. Sonymen qatar 10 jeltoqsan búgingi Qazaq KSR-niń Qazaqstan Respýblıkasy bolyp ózgergen kúnimen sáıkes kelip tur», - dep bastaǵan vıtse-premer 30 jyl burynǵy qıyndyqtardy eske aldy.
«30 jyl buryn Qazaqstan áleýmettik-ekonomıkalyq turǵyda álsiregen memleket edi. Ómir sapasy boıynsha biz burynǵy odaqtas elderdiń arasynda 13 orynda turdyq. KSRO qulaǵannan keıin burynǵy odaqtastar arasyndaǵy ekonomıkalyq baılanystyń úzilýi shuǵyl gıperınflıatsııaǵa, turaqty bıýdjet tapshylyǵyna, halyq tabysynyń shapshań tómendeýine, jappaı jumyssyzdyqtyń ósýine ákep soqtyrdy. Inflıatsııa 3000 protsetke jetken kezderi boldy. Osyndaı kúrdeli kezeńde Ult kóshbasshysy eldiń damýyna negiz bolǵan «Áýeli ekonomıka, saıasat sodan keıin» deıtin strategııany qabyldady. Tuńǵysh Prezıdenttiń jeke basshylyǵymen qysqa merzimde naryqtyq ekonomıkaǵa jol ashqan irgeli zańnamalyq baza qurylyp, jańa fıskaldyq jáne bank júıesi engizildi», - dedi Eraly Toǵjanov.
Úkimet basshysynyń orynbasary Táýelsizdik jyldarynda qol jetkizgen tabystardy sanmen sóıletti.
«Táýelsizdik sımvolynyń biri retinde ulttyq valıýta – teńge aınalymǵa shyǵaryldy. Jańa saýda-ekonomıkalyq baılanys ornatý boıynsha sharalar qabyldandy. Naryq sharttaryna kásiporyndardy ǵana emes, halyqty da ıkemdeý kerek edi. Bul múmkin boldy. Otandyq bıznestiń damý jaǵdaıy túbegeıli ózgerdi. Jumys istep turǵan shaǵyn jáne orta bıznestiń sany 2005 jylǵy 500 myńnan 2021 jyly 1,4 mıllıonǵa deıin artty. Nátıjesinde 30 jyl ishinde jalpy ishki ónim kólemi dollar ekvıvalentinde 17 ese ósti. Osy sharalardyń bári eldiń uzaq merzimdi áleýmettik-ekonomıkalyq damýy men saıası turaqtylyǵyna negiz boldy. Halyqtyń tabysy 10 ese artyp, jumyssyzdyq deńgeıi 12,8 paıyzdan 4,9 paıyzǵa deıin azaıdy. 20 jyldyń ishinde halyqtyń sany 4 mln adamǵa kóbeıdi. Búgin eldegi ómir súrý uzaqtyǵy 71-ke deıin ulǵaıdy. El táýelsizdiginiń basynan beri 1,5 mln azamat turǵyn úı jaǵdaıyn jaqsartty. 5 myńnan astam jańa áleýmettik nysan salyndy. Sonyń arqasynda balalardy mektepke deıingi bilim berýmen qamtý úlesi 99 paıyzǵa deıin jetti», -dedi vıtse-premer.
