Táýelsizdik jyldarynda ǵasyrǵa para-par joldy eńserdik - Nyǵmatýlın
«Búgingi konferentsııanyń taqyryby »Prezıdenttik ınstıtýt: Qazaqstandyq model« dep atalady. Bul taqyryp tosynnan tańdalǵan joq, ol zańdy ári ózekti. 2020 jyldyń sáýirinde Qazaqstanda prezıdenttik ınstıtýttyń engizilgenine týra 30 jyl tolady. Osylaısha, basqarýdyń prezıdenttik úlgisin tańdaý Qazaqstannyń óz Táýelsizdigi jolyndaǵy kúrdeli alǵashqy qadamdardyń biri boldy. Qazaq KSR-niń Joǵarǵy keńesi 1990 jyldyń 24 sáýirinde Qazaq KSR Prezıdenti laýazymyn bekitý jáne Qazaq KSR Konstıtýtsııasyna túzetýler men ózgerister engizý týraly zań qabyldady», - dedi Nurlan Nyǵmatýlın.
Onyń atap ótýinshe, naryqtyq ekonomıkalyq qarym-qatynas qurý, birpartııalyq júıeni joıý, bılikti bólý ustanymdaryn birtindep engizý prezıdenttik ınstıtýt qalyptastyrýdyń eń basty alǵysharty boldy. Mundaı jaǵdaıda prezıdenttik qurylymdy, azamattardyń quqyqtaryn, bostandyǵy men qaýipsizdigin saqtaý ári nyǵaıtý mindettemesimen qatar saıası jáne ekonomıkalyq ózgeristerdi jedel júrgizý qajet edi.
«Sol ýaqytta el basshylyǵynyń aldynda dál osyndaı kúrdeli ári kóp josparly mindetter turǵan edi. Qazaqstandaǵy prezıdenttik ınstıtýttyń ózindik erekshelikteriniń, ózine tán sıpatynyń bolýy barynsha zańdylyq. Endi eki aptadan keıin Qazaqstan Táýelsizdiginiń 28 jyldyǵyn atap ótetin bolamyz. Tarıhı ǵylym men saıası tájirıbe turǵysynan alyp qaraǵanda bul qysqa ǵana merzim bolǵanymen jetistikter men tabystar turǵysynda biz ǵasyrǵa teń joldy eńserdik. Bul jeńister men jetistikter jyldary, barsha halyqtyń tabandy eńbeginiń jáne alǵa qaraı kidirissiz umtylystyń jyldary boldy», - dedi Májilis tóraǵasy.
Aıta keteıik, konferentsııa jumysyna QR Parlamenti Senaty men Májilisiniń depýtattary, Ázerbaıjan, Bolgarııa, Túrkııa, Tatarstan, Qyrǵyzstan, Mońǵolııa, Serbııa, Frantsııa parlamentarııleriniń ókilderi qatysýda.
