Táýelsizdik jyldarynda demokratııalyq memlekettiń jáne naryqtyq ekonomıkanyń talaptaryna saı keletin ulttyq-quqyqtyq júıe qalyptasty - Elbasy quttyqtaýy
ASTANA. 16 mamyr. QazAqparat - Táýelsizdik jyldarynda demokratııalyq memlekettiń jáne naryqtyq ekonomıkanyń talaptaryna saı keletin ulttyq-quqyqtyq júıe qalyptasty.
Bul týraly QR Prezıdenti Nursultan Nazarbaevtyń zańgerlerdiń respýblıkalyq sezine qatysýshylaryna joldaǵan quttyqtaýynda aıtylǵan. Atalǵan quttyqtaýdy búgin QR Memlekettik hatshysy Muhtar Qul-Muhammed sezd jumysy barysynda oqyp berdi.
«Sizderdi sezd jumysynyń bastalýymen quttyqtaımyn. Ótkizilip otyrǵan sezd Qazaqstannyń barlyq zańgerler qaýymdastyǵyn jınap otyr. Sezd zańgerlik ǵylym men praktıka, bıznes qaýymdastyǵy, memlekettik apparat, advokattar, notarıýs tarabynan kelgen zańgerlerdiń, qazaqstandyq úkimettik emes uıymdar men qoǵamdyq birlestikter ókilderiniń basyn qosyp otyr. Qazaqstannyń memlekettik táýelsizdigine 20 jyldan astam ýaqyt ótti. Osy kezeńde bizde zamanaýı demokratııalyq memlekettiń jáne naryqtyq ekonomıkanyń talaptaryna saı keletin ulttyq-quqyqtyq júıe qalyptasty. Bul iste Qazaqstannyń memlekettiliginiń negizin qalaýshy zańdar men ınstıtýttardy qorǵaýdyń basynda turǵan bizdiń zańgerlerimiz orasan zor ról atqardy. Halyq danalyǵy aıtqandaı, bizdiń kúshimiz - birlikte. Sondyqtan, ótip jatqan sezdiń kún tártibindegi basty másele - elimizdiń zańgerler qoǵamdastyǵynyń basyn biriktirý bolyp tabylatyn jańa qoǵamdyq uıym qurý», - delingen Elbasy quttyqtaýynda.
Sondaı-aq, qazirgi ýaqytta azamattardyń quqyqtary men bostandyǵyn qorǵaý salasyndaǵy zańgerlik qoǵamdastyqtarmen qarym-qatynastardy barynsha tereńdetý qajettigine basa nazar aýdarǵan Memleket basshysy sezdiń jumysyna syndardy da tabysty jumys tileıtindigin atap ótken.
