Táýelsizdik jyldarynda 81 myńǵa jýyq ataýly kitap jaryq kórdi
Sharanyń saltanatty ashylý rásiminde Memlekettik hatshy elorda tórinde tórt kún boıy ótetin Eýrazııalyq halyqaralyq kitap kórme-jármeńkesi barlyq kitapsúıer qaýymnyń rýhanı merekesi ekendigin atap ótti. Sonymen qatar taıaýda «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda jaryq kórgen alǵashqy 18 kitap Elbasy Nursultan Nazarbaevqa tanystyrylǵandyǵyn aıtty.
«Táýelsizdik alǵannan keıin Qazaqstanda ulttyq kitap basyp shyǵarý isi damýynyń jańa kezeńi bastaldy. Osy jyldardyń ishinde jalpy taralymy shamamen 400 mln dana bolatyn 81 myńǵa jýyq ataýly kitap shyǵaryldy. Tek 2010 jyldan bastap qana kitap basyp shyǵarý isine 10 mlrd teńgeden astam qarajat bólindi. Búginde baspa qyzmetimen 380 kompanııa aınalysady», - dedi Gúlshara Ábdiqalyqova.
Aıta keteıik, «Eurasian Book Fair - 2018» ІІІ Eýrazııalyq halyqaralyq kitap kórme-jármeńkesi sáýirdiń 25-28 aralyǵynda «Kórme» kórme ortalyǵynda jumys isteıdi. Bıylǵy kórme QR Mádenıet jáne sport mınıstrligi men Astana ákimdiginiń qoldaýymen elordanyń 20 jyldyq mereıtoıyna arnalǵan. Kórme-jármeńkege álemniń Reseı, Ulybrıtanııa, Polsha, Túrkııa, Qytaı, Úndistan, Ózbekstan syndy 18 elinen 155 kompanııa men uıymnyń ókildikteri qatysýda.
