Táýelsizdik jyldarynda 4,5 myń polıtseı jaraqat alǵan

NUR-SULTAN. QazAqparat – 30 jyl ishinde Qazaqstanda 800-den astam polıtseı qaza tapty. Bul týraly QR Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Táýelsizdik jyldary qyzmettik boryshyn atqarý kezinde 815 qyzmetker qaza taýyp, 4593 qyzmetker jaraqat alǵan», - dedi Shuǵyla Turlybek mınıstrliktiń baspasóz alańynda ótken brıfıng barysynda.

23 maýsym kúni qazaqstandyq polıtseıler kásibı merekelerin atap ótti. Erekshe kózge túsken birqatar qyzmetkerge QR Prezıdenti Qasym-Jomart Toqaev nagradalar men gramotalardy tabystady

«Mınıstrdiń buıryǵymen ishki ister organdarynyń 1200-den astam qyzmetkeri men áskerı qyzmetshileri, sondaı-aq ishki ister organdary men Ulttyq ulannyń 60-qa jýyq ardageri janqııarlyǵy men qyzmettik boryshyn úlgili atqarǵany úshin marapattaldy», - dedi Sh. Turlybek.

Budan buryn habarlanǵandaı, Memleket basshysy Qasym-Jomart Toqaev Qazaqstan polıtsııasynyń 30 jyldyǵyna arnalǵan saltanatty jıynda sóz sóıledi.