Táýelsizdik jyldary týǵan el maqtanyshtary
Olardyń ishinde el ekonomıkasyna, sport salasyna erekshe eńbek sińirip júrgen azamattar bar.
Búgin jaqsylyqtyń jarshysy sııaqty egemendikpen jarysa týǵan táýelsizdiktiń maqtanyshtary týraly jazýdy jón kórdik.
Olardyń biri – Ádilet Tıkanov. 29 jastaǵy jigit Almaty tsırkinde jumys isteıdi.
Jas akrobat 1991 jyly 21 qyrkúıekte Pavlodar qalasynda týǵan. 1999 jyly Almatyǵa otbasymen kóship kelgen. Talǵar aýdanynyń Panfılov aýylynda bilim alǵan.
«Bala kezimnen break dance bıine qumar bolyp, kóshe akrobatıkasyna áýes boldym. Biraq, tsırk ártisi bolýdy oılamappyn. Bala kezimde polıtsııa qyzmetkeri bolýdy armandadym. Eseıgen soń dostarym Júsipbek Elebekov atyndaǵy estrada jáne tsırk kolledjine túse bastady. Men de baǵymdy synap kórdim. Osylaısha, oqýǵa grantqa túsip kettim», - dedi Ádilet.
Jaqynda Ádilet «Ýkraına talanty», Kytaıda ótken «Central Asia» shoýlaryna qatysyp keldi.
«Qańtarda «British got talent» shoýyna qatysýǵa daıyndalyp jatyrmyz. Jaqynda shyǵarmashylyq ujym vıdeokastıngiden ótti. Odan ary qaraı Monte-Karloda (Monako) ótetin festıvalge qatysamyz. Basqa da festıvalderden bas júlde, altyn, kúmis, qola júldeler alyp júrmiz», - dedi ol.
Ádilettiń aıtýynsha, qazir balalarda kóp múmkindik bar.
«Bizdiń bala kezimizde kámpıt jeýdiń ózi qýanysh bolatyn. Qazir balalarda uıaly telefon, qalaǵan oıynshyǵy, kıimi – barlyǵy bar. Olar tarshylyq kórmegen. Munyń barlyǵy – Táýelsizdiktiń arqasy! Qazir memleket tarapynan jastardyń damýyna, bilim alýyna, qalyptasýyna barlyq jaǵdaı jasalǵan. Sondyqtan, jastar osyny baǵalaýy kerek. Olar barynsha bilim alyp elin sheteldik arenalarda pash etýge umtylýy tıis», - dedi ol.
Al balýan, Qazaqstan sport sheberi Damır Kúzembaev 1991 jyly 2 qarashada týǵan. 13 jasqa deıin taekvando, odan keıin kúrespen aınalysqan. 2007 jyldan bastap Damır Jańabaı Ospanovtan tálim alyp otyr.
Damır Qazaqstan chempıonatynda 2 kúmis, 2 qola júlde alǵan. Al 2016 jylǵy Qazaqstan birinshiliginde chempıon atandy.
«Eń bastysy, sportta týǵan elimniń mereıin kóterý – maqsatym. Jeńis tuǵyrynda turǵandaǵy sezimdi aıtyp jetkizý múmkin emes. Barlyq jastar týǵan tilin syılap, ulttyq rámizderin qurmettep tursa – nur ústine nur», - dedi ol.
Damırdiń sheteldegi alǵashqy jeńisi 2008 jyly Tashkentte ótken Azııa chempıonatynda boldy.
2013-19 jyl aralyǵynda ótken Azııa chempıonattarynan ol júldesiz qaıtpaǵan.
Nıkıta Flıpov 1991 jyly 7 qazanda týǵan. Ol jeńil atletıkadan Qazaqstannyń halyqaralyq sport sheberi, London Olımpıadasynyń qatysýshysy. 2015 jyly Búkilálemdik ýnıversıadada altyn medal ıelengen.
Qazir ol jas sportshylardy tárbıeleýmen aınalysady
«Ózim táýelsiz eldiń týmasy bolǵandyqtan, bolashaq chempıondardy azat oılaýǵa, jeńimpaz bolýǵa úıretemin. Táýelsizdik bizge ózimizdiń damýdyń jeke dańǵyl jolyn tańdaýǵa, óz ustanymymyzdy, ulttyq ıdeologııamyzdy qalyptastyrýǵa múmkindik berdi», - dedi ol.
