Táýelsizdik jyldary Qazaqstan ǵylymy kóptegen salalar boıynsha halyqaralyq deńgeıdegi zor nátıjelerge qol jetkizdi - Baqytjan Jumaǵulov
ALMATY. 1 jeltoqsan. QazAqparat /Erlik Erjanuly/ - Qazaqstannyń ǵylym salasy da memleketpen birge qaryshtap damyp kele jatyr. Bul týraly QR Bilim jáne ǵylym mınıstri Baqytjan Jumaǵulov búgin Almatyda QR Prezıdenti Nursultan Nazarbaevtyń qatysýymen ótken Qazaqstan ǵalymdarynyń forýmynda aıtty.
"Qazaqstan sanaýly memleketterdiń qatarynda qus tumaýy men dońyz tumaýyna qarsy óz vaktsınasyn ázirledi. Qaterli isik aýrýyna qarsy biregeı otandyq "Arglabın" preparatyn oılap tapty. Ol kóptegen elderde tirkelip, patentke ıe boldy", - dedi Baqytjan Tursynuly. Onyń aıtýynsha, qazirgi tańda "Fıtohımııa" holdıngi Ulybrıtanııa, AQSh, Shveıtsarııa, Germanııa, Túrkııa, Pákistan, Qytaı, Reseı, Belarýs elderiniń 30 ǵylymı uıymymen birlesip jumys isteıdi. Mıkrobıologııa jáne vırýsologııa salasynda halyqaralyq uıymdardyń granttyq qoldaýymen AQSh, Ulybrıtanııa, Germanııa, Reseı ǵalymdarymen birge zertteýler júrgizilýde. Sondaı-aq mıneraldy shıkizatty keshendi óńdeý jónindegi ulttyq ortalyqtyń tehnologııasy boıynsha Bolıvııa, Italııa, Kanadada zaýyttar salynyp jumys isteýde.
