Táýelsizdik jyldary BQO óńdeýshi ónerkásibi shamamen 12 esege deıin ósken
ASTANA. 22 jeltoqsan. QazAqparat - BQO-da óńdeýshi ónerkásiptiń turaqty ósýi men damýy qamtamasyz etilip otyr,
dep habarlaıdy pm.kz saıty.
Bul salada óndiris kólemi 11,9 esege ósip, 7 mlrd. teńgeden 83 mlrd. teńgege deıin jetken.
Saıttyń málimetterine qaraǵanda, táýelsizdik jyldary respýblıkanyń jalpy ishki ónimindegi Batys Qazaqstan oblysynyń úlesi 2,7 paıyzdan 4,8 paıyzǵa deıin artty.
Sonymen qatar, ónerkásiptik ónimder óndirisiniń kólemi 1995 jylǵy 12,3 mlrd. teńgeden 2010 jyly 990,1 mlrd. teńgege deıin artty. Oblys kásiporyndarynyń óndiris kólemderiniń turaqty artýy, jańa óndiristerdiń damýy jáne qosymsha qýattardyń iske qosylýy ónerkásiptik ónimderdiń ornyqty ósýine qoldaý boldy. Atap aıtqanda, jalpy óńirlik ishki ónimdegi ónerkásip salasynyń úles salmaǵy 20,7 paıyzdan 53,2 paıyzǵa deıin ulǵaıdy.
«Jalpy óńirlik ónimniń kólemi 1995 jylǵy 25 mlrd. teńgeden 2010 jyly 2048,8 mlrd. teńgege deıin ósti, al jan basyna shaqqanda 38,5 myń teńgeden 1730,4 myń teńgege deıin ulǵaıdy», - delingen habarlamada.
