Táýelsizdik jyldary Aqmola oblysyndaǵy aýyl sharýashylyǵy salasy qalaı damydy

KÓKShETAÝ. QazAqparat - Aqmola oblysy elimizdiń iri agroónerkásiptik óńir sanalady jáne Qazaqstannyń azyq-túlik qaýipsizdigin qamtamasyz etýge eleýli úles qosýda. El egemendigin alǵannan bergi ýaqytta oblysta aýyl sharýashylyǵyndaǵy negizgi kórsetkishterdiń ósý úrdisi baıqalady, dep habarlaıdy QazAqparat tilshisi oblystyq ishki saıasat basqarmasyna silteme jasap.

Osy saladaǵy jalpy ónim kólemi 1991 jylǵy 11,3 mıllıon teńgeden 2020 jyly 672 mıllıard teńgege deıin ósti. Progressıvti agrotehnıkalyq tehnologııalardy engizýdiń arqasynda dándi daqyldardyń ónimdiligi 1991 jylǵy gektarynan 6,1 tsentnerden 2020 jyly 11,6 tsentnerge deıin artty. Sýarmaly jerlerdiń aýdany 29,5 myń gektarǵa deıin, tuqym sebý alańy - jalpy egis alańynyń 92 paıyzyna deıin ulǵaıtyldy. Sonymen birge, óńirde et, sút jáne qus sharýashylyǵyn damytýǵa kóp kóńil bólinýde.

Aýyl sharýashylyǵy basqarmasynyń málimetinshe, sońǵy on jylda mal, qus sanynyń jáne aýyl sharýashylyǵy ónimderiniń negizgi túrlerin óndirýdiń aıtarlyqtaı ósýi baıqalady.

«Búginde Aqmola oblysynyń et óndirisiniń respýblıkalyq kólemindegi úlesi orta eseppen 12 paıyzdy, sút – 6,5 paıyzdy, jumyrtqa-16,5 paıyzdy quraıdy, bul rette óz qajettilikterin ǵana emes, astanany da qamtamasyz etedi. Óńir respýblıkada mal bordaqylaý boıynsha úlken áleýetke ıe-bir mezgilde 36,5 myńnan astam iri qarany bordaqylaı alady. Tek 2018 jyldan bastap oblysta 278 et fermasy quryldy. Bıylǵy jyly 5,3 myń bas etti baǵyttaǵy iri qara mal satyp alynyp, 102 et fermasy quryldy. Aldaǵy bes jylda taǵy 700 ferma ashý josparlanǵan», - dep atap ótti oblystyq vedomstvodan.

Sút óńdeý kásiporyndaryn shıkizatpen qamtamasyz etý úshin oblysta jalpy sıyr basy 14 myń bolatyn 56 mamandandyrylǵan sút-taýar fermasy jumys isteıdi. Bıylǵy jyly saýyn sıyrlarynyń sanyn 2,1 myń basqa ulǵaıta otyryp, 17 sút-taýar fermasynyń qýaty qurylyp, keńeıtildi.

Etti qus sharýashylyǵyn damytý maqsatynda 2018 jyly Makınsk qus fabrıkasy iske qosyldy. 2020 jyly qýattardy jylyna 56 myń tonnaǵa deıin keńeıtý boıynsha ekinshi kezekti iske qosqannan keıin, qus fabrıkasy Qazaqstannyń ishki naryǵynyń qajettiligin 22 paıyzǵa deıin qamtamasyz ete otyryp, Ortalyq Azııadaǵy taýyq etin óndirý kólemi boıynsha iri kásiporynǵa aınaldy. Úshinshi kezeńdi iske qosý bastaldy, ony iske qosý 2023 jyly qus etin óndirý kólemin 75 myń tonnaǵa deıin ulǵaıtýǵa múmkindik beredi.

Aıta keteıik, Nur-Sultan mańynda azyq-túlik beldeýin qurý óńirdi damytýdyń strategııalyq basymdyqtarynyń biri bolyp tabylady. Aqmola oblysy elordaǵa sút, et ónimderiniń, kókónisterdiń úshten bir bóligin jetkizedi, jumyrtqa men kartoppen tolyqtaı qamtamasyz etedi.