Táýelsizdik jolynda jan qıǵan Kenesary hannyń basyn qaıtara almasaq eldigimizge syn - A. Ábildaev
«Prezıdent Nursultan Nazarbaev «Qazaqstan-2050» Strategııasy - qalyptasqan memlekettiń jańa saıası baǵyty» atty Joldaýynda «Biz ulttyń tarıhı sanasyn qalyptastyrý jumysyn jalǵastyrýymyz kerek» dep atap kórsetti. Sodan beri elimizde ult rýhyn kóteretin is-sharalar naqty nátıjege jalǵasty. Sonyń basty dáleli - 6 maýsym kúni Memlekettik hatshy Marat Tájınniń Eýrazııa ulttyq ýnıversıtetinde keńeıtilgen otyrysta «Naǵyz ulttyq qadir-qasıet naǵyz ulttyq tarıhtan bastalady» dedi. Osyǵan oraı búgingi saýalymdy joldamaqpyn», - dep sóz bastaǵan depýtat Azamat Ábildaev han Keneniń ult tarıhyndaǵy ornyna keńinen toqtalyp ótti. Onyń aıtýynsha, Reseı ımperııasyna qarsy kóterilis uıymdastyrǵan Kenesary jaıynda sol zamandaǵy orys tarıhshysy Nıkolaı Seredanyń ózi «Kenesarynyń qolbasshylyq darynyna kez-kelgen eýropalyq qolbasshy qyzyǵytyndaı edi!» dep jazyp qaldyrǵan. «Reseı men Qoqan handyǵyna bir kezeńde qarsy shapqan Han Kenekem búgingi Almaty,Jambyl, Qyzylorda, Shymkent oblystaryna qarasty jerlerdegi qazaqtardy Qoqan qorlyǵynan qutqaryp qalǵan edi», - deıdi A. Ábildaev.
Budan bólek, depýtat Kenesarynyń keıingi taǵdyryna toqtala kele, bir kezderi Reseı asqan hannyń basyn qaıtarýǵa myqtap kirisý qajettigin alǵa tartty.
«Búginde elimiz Táýelsizdik alǵanda azattyq úshin jan qıǵan uly babamyzdyń basyn Otanyna qaıtaryp, jer qoınyna tapsyra almaı jatqanymyz ulttyq qasiret týǵyzyp otyr. Álem tanyp, er Kenekem atpen júrgen jerdiń asty men ústi baılyqqa kenelgende urpaqtarynyń osylaı qoly baılanyp, namysy qaıralyp otyra bere me?! Babamyzdyń basyn qaıtarýǵa meniń usynysym bar: bizdiń Úkimet qarajatyn qarastyryp tarıhshy-jazýshylardan bir kishkene top qurylsa. Topqa Kenesary hannyń basyn qaıtarý ıdeıasyna tereń berilgen bir azamatty jetekshilikke bekitip, Reseı Úkimetine kelissóz júrgizýge quqyq berilse. Olar burynǵy jolmen júrip - qaǵazbasty bolmaı, isti birden bastap, Kenesary hannyń basyn alyp oralsa. Eń sońǵy hanymyz Táýelsizdik jolynda jan qıǵan Kenesary hannyń basyn qaıtara almasaq eldigimizge syn! Sondyqtan oılanaıyq, aǵaıyn!»,-dedi depýtat Azamat Ábildaev.
