Táýelsizdik jolynda qýǵyndalǵandardy este qaldyrý boıynsha arnaıy joba ázirlenedi

NUR-SULTAN. QazAqparat – Qazaqstannyń táýelsizdigi jolynda qýǵynda bolǵan azamattardyń eńbegi men erlikterin máńgi este qaldyrý jónindegi arnaıy joba ázirlenedi. Bul jaıynda Májilis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy QazAqparat tilshisi.

«QR Prezıdentiniń Jarlyǵymen, Memlekettik hatshynyń tóraǵalyǵymen Saıası qýǵyn-súrgin qurbandaryn tolyq aqtaý jónindegi memlekettik komıssııa quryldy. Onyń quramyna qoǵamdyq uıymdardyń ókilderi men elimizdiń ǵalymdary, Prezıdent Ákimshiligi men Úkimet ókilderi, depýtattary, múddeli memlekettik organdardyń basshylary, kirdi», - delingen Úkimet basshysynyń orynbasarynyń jaýabynda.

Onyń atap ótýinshe, muraǵat kózderi men basqa da materıaldardy jınaý, zerdeleý, memlekettik komıssııaǵa qorytyndylar daıyndaý jónindegi 11 baǵyt boıynsha jumys toptarynyń quramdary bekitildi.

«Sizderdiń 700-den astam tulǵany quraıtyn Alash qaıratkerleriniń tizimi Memlekettik komıssııa qyzmetin súıemeldeý jónindegi jobalyq ofıske, sonymen birge tıisti jumys tobyna joldanyp, qaraý nátıjeleri ǵalymdardyń muraǵattarda júrgizgen jumys qorytyndylaryna sáıkes usynylatyn bolady (tarıhı anyqtama negizinde). Jalpy, barlyq zertteý jáne izdestirý jumystary aıaqtalǵannan keıin Qazaqstannyń bostandyǵy men táýelsizdigi jolynda qýǵyn-súrgin qurbandary bolǵan azamattardyń eńbegi men erlikterin máńgi este qaldyrý jónindegi arnaıy jobany ázirleý josparlanýda», - dedi Eraly Toǵjanov saýalǵa bergen jaýabynda.