Táýelsizdik urpaqtary: 15 jasqa 1 mln teńgeniń sertıfıkaty tabystaldy
Prezıdent Qasym-Jomart Toqaevtyń tapsyrmasyna sáıkes, respýblıkalyq deńgeıde mádenıet, ǵylym, bıznes, medıa, IT salalaryndaǵy jastar bastamalaryn qoldaý maqsatynda 2021 jyldan bastap granttar taǵaıyndalǵan bolatyn. Jas býynnyń áleýetin arttyryp, qanatyn qataıtýǵa arnalǵan iste Almaty oblysynda 15 úzdik joba qoldaý tapty.
Bilimi men biligi ushtasqan qyz-jigitterdi jeńisterimen aımaq basshysy Marat Sultanǵazıev quttyqtady.
«Búgingi jastardyń bilimge, ınnovatsııany úırenýge, shet tilderin meńgerýge degen talpynystary, eńbekqorlyǵy bizdi qýantady. Jeńimpaz atanǵan jobalar óńirimizdegi ózekti máselelerdi sheshýge, memlekettik jastar saıasatyn jemisti júzege asyrýǵa serpin beretin jasampaz isterdiń bastaýy bolsyn. Bul baǵyttaǵy jumys aldaǵy ýaqytta da jalǵasyn tabady. Jalpy, memlekettik jastar saıasatyn júzege asyrý bizdiń basty mindetterimizdiń biri», - dedi oblys ákimi Marat Eleýsizuly.
Qoǵamnyń ár salasynda bıznes-ıdeıalary men ózindik josparlaryn júzege asyrýdy kózdegen jastar qarasy qalyń bolǵanymen, grant jobasyna barlyǵy 35 úmitker qatysqan. Solardyń ishinde tek 15-i jeńimpaz atanyp, 1 mln teńgeniń sertıfıkattaryna ıe boldy.
Bulardyń qatarynda medıa baǵytynda jeńimpaz atanǵan jas vıdeograf Sáken Quttyqbaı da bar. Ol óz kezeginde uıymdastyrýshylarǵa alǵysyn bildirip, mundaı jobalar el jastaryna úlken úmitpen birge bolashaqqa degen senim syılaıtynyn alǵa tartty.
«Búgingi kún men úshin óte mańyzdy, Sebebi, meniń jobalaryma qarjylaı qoldaý tabyldy. Meniń medıa salasy boıynsha usynǵan jobam «Generation» dep atalady. Qazaqsha aıtatyn bolsaq, «Urpaq» degen maǵana beredi. Joba aıasynda jastarǵa arnalǵan 3 qysqametrajdy fılm túsiriledi. Birinshisi «Ýaqyt» dep atalady. Fılm jastarǵa ýaqytty tıimdi qoldanýdy, baǵalaý kerektigin túsindiredi. Ekinshi týyndyǵa «Nashaqor» degen at arqaý boldy. Bul jerde jaman ortaǵa túsý, ishimdikke salyný keıin nashaqor bolýǵa ákelýi múmkin ekeni baıandalady. Al sońǵysy «Qumar oıyn» dep atalady. Óıtkeni, qazirgi tańda qumar oıyndarǵa salynyp ketý óte ońaı. Tipti úıden shyqpaı-aq búkil múlikten aıyrylyp qalýǵa bolady. Bul jobanyń maqsaty jastar durys jolda júrip, ýaqytty jáne jaqyndaryn baǵalaýy eń basty qundylyq ekenin qalyń kópke túsindirý», - dedi Sáken Muhtaruly.
Aıta ketý kerek, oblys halqynyń 19 paıyzyn jastar quraıdy. Olardyń jalpy sany - 280 myń. Búgingi kúni olarǵa qoldaý kórsetýdiń túrli baǵyttaǵy sharalary qarastyrylǵan.
Máselen, 2022 jyly oblys tarıhynda tuńǵysh ret jergilikti jastardy baspanamen qamtamasyz etýge qoldaý kórsetý úshin «Alataý jastary» atty turǵyn úı baǵdarlamasy bastaý aldy. Bastapqy jarnasyz 60 páter alý úshin 600 mln teńge bólindi. Bıyl osy baǵdarlamaǵa bólinetin qarajat kólemi 3,6 mlrd teńgege deıin kóbeıtildi. Bul qarjy 200 páter alýǵa múmkindik beredi.