TÁÝELSІZDІK TÝRALY PІKІR: Táýelsizdik qundylyǵy - tárbıe men bilimniń túp-tamyry - Aıagúl Mırazova
«Otandy shynaıy súıý - el táýelsizdiginiń qundylyqtaryn sezinýden, túsinýden bastalady. Bul tárbıe arqyly, bilim arqyly boıǵa sińedi. ıAǵnı táýelsizdik qundylyǵy - tárbıe men bilimniń túp-tamyry . Sondyqtan, óskeleń urpaqty adamgershilikke tárbıeleı otyryp ta, bilim bere otyryp ta oǵan táýelsizdiktiń mańyzyn, mánin, qundylyǵyn túsindirýimiz qajet. Al olar Elbasymyzdyń «Táýelsizdik tolǵaýynda» aıqyn kórinis tapqan. Bul oı oramdarynyń oqý baǵdarlamalaryna engizilýin qoldaı otyryp aıtarym, táýelsizdik qundylyqtary bir pánde ǵana emes, basqa da pánderdiń ón boıynda kórinis tabýy kerek dep oılaımyn» - dedi Aıagúl Mırazova Elbasynyń «Táýelsizdik tolǵaýyn» mektep, kolledj jáne joǵary oqý oryndarynyń bilim baǵdarlamalaryna engizý týraly tarıhshylar kongresiniń usynysyna baılanysty aıtqan sózinde. Sonymen qatar, Aıagúl Tóreqyzynyń aıtýynsha, bul jerde tárbıeniń orny erekshe. «Tárbıe bilimniń aldynda júredi. Óıtkeni, «Tárbıesiz berilgen bilim - adamzattyń qas jaýy», dep ál-Farabı babamyz beker aıtpaǵan. Táýelsizdik qundylyǵy, onyń keleshegi, máni, maǵynasy, sonyń jolynda Elbasymyzdyń, Qazaqstan halqynyń atqaryp jatqan eńbekteri de tárbıe arqyly túsindiriledi. Bul jerde ustazdardyń róli - erekshe. Jastarǵa keıde burynǵydaı emes dep renjip jatamyz. Buǵan birinshi kezekte ustazdardyń ózderi jaýapty. Másele - qundylyqtarymyzdy qalaı bolǵanda da, jetkize, uǵyndyra bilý. Otan otbasynan bastalady deıtin bolsaq, bul ıgi shara bala baqshadan bastap, myqtap qolǵa alynsa, quba qup bolar edi», - dedi Aıagúl Mırazova.
