Táýelsizdik týraly alǵash habar halyqqa qalaı jetti – ardager jýrnalıstiń esteligi

AQTAÝ. QazAqparat – Qazaqstan táýelsiz el boldy. Osy jańalyqty alǵash estigen kezde sol kezde aqparat salasynda júrgen tilshiler qaýymy qandaı sezimde boldy, súıinshi habardy halyqqa qalaı jetkizdi? QazAqparat tilshisi osy saýaldy 1991 jyly Mańǵystaý oblysy teleradıokompanııasynyń bas redaktory bolǵan ardager jýrnalıst Jolaman Boshalaqqa qoıǵan edi.

«Táýelsizdik» degen sóz 1991 jylǵa deıin kóp estilmeıtin edi. Joǵarydan habar kelgende eldiń qýanyshynda shek bolmady. Óıtkeni, bul – ata-babalarymyz júzdegen jyldar kútken kúni ǵoı. Al dál sondaı kezge bizdiń urpaqtyń tap bolýy – naǵyz baqyt. Ol kezde tikeleı efırge shyǵa alatyn tehnıkamyz da joq. Jazyp alǵanymyzdy montaj jasaımyz. Degenmen qolymyzdan kelgeninshe, halyqqa qýanyshty jetkize bildik» - dedi ol.

Jýrnalıst el egemendigi jaıly jańalyqty qýana qarsy alǵanyn aıtady.

«Halyqtyń kóńil kúıi óte joǵary boldy. Bul qýanysh ákesi bazardan syılyq ákelgende qýanatyndaı jaı ǵana sezim emes qoı, úlken jaýapkershilik júkteıtin jumys edi. Táýelsizdik alyndy, al sol táýelsizdiktiń tuǵyryn bekitý, mártebesin bıiktetý jaýapty jumystarda júrgenderdiń mindeti boldy. Al bizder - baspasóz qyzmetkerleri ózimizdiń qolymyzdan kelgeninshe, tilimizdiń jetkeninshe, bul – úlken qasıetti uǵym ekenin, óte jaýapty kez ári bizge asa qymbatqa túskenin aıta bildik» -dep tolǵandy Jolaman Boshalaq.

Táýelsizdik deklaratsııasy qabyldaǵannan keıin Jolaman Boshalaq basqarǵan telearna efırinen kún saıyn aımaqtaǵy zııaly qaýym ókilderiniń pikirlerin bere bastaǵan. Sol arqyly kórermenge el táýelsizdiginiń qadir-qasıetin jetkize otyryp, qandaı jaýapkershilik ekenin de túsindirýge tyrysqan.

«El ishindegi zııaly qaýym, ómir kórgen úlken aqsaqaldarymyzdy, eńbek ozattaryn sóılettik. Olar qýanyshtaryn jetkizýmen birge halyqty, ásirese jastardy birigýge, jaqsy jumys isteýge shaqyrdy. «Mine, táýelsizdikti aldyq!» dep toı toılap ketpeı, birlikte bolý kerek ekenin úlken kisilerge aıttyrdyq», - dedi ardager jýrnalıst.

Táýelsizdik týraly alǵashqy qýanyshty jańalyqty jetkizgen jergilikti jýrnalıster endi erkindiktiń qadirin halyqqa turaqty túrde nasıhattaı bergen.

«Biz ony bir-eki kúndik jumys dep oılaǵan joqpyz.Turaqty túrde habarlardy bere bastadyq. Osy jolda eńbegi bar adamdarǵa arnaıy rýbrıka ashyp, únemi nasıhattap otyrdyq», - dedi ol.

Ardager tilshiniń aıtýynsha táýelsizdiktiń qadir-qasıetin halyq jaqsy túsingen. Usaq sharýalar jergilikti jerde sheshilip, alysqa alańdamaıtynyna qýanǵan.

«1991 jyldan keıin halyqtyń eńbekke degen yntasy da, kóńil kúıi de ózgerdi. Óńir de, ómir de - bári jaınap ketpegenimen, aldaǵy kúnge degen arman-tilegi oryndalatyndaı sezim boldy. Sonyń bári «Táýelsizdikke táýbe!» dep aıtýǵa turatyndaı edi. Biz áli de táýelsizdiktiń tuǵyryn bıiktete túsýimiz kerek. Eldiń jetistikterin eseleı túsýimiz qajet. Qazaq eliniń Táýelsizdigi tuǵyrly bolsyn!», - dep Jolaman Boshalaq sóz sońynda eldi merekemen quttyqtady.