Táýelsizdik toıyna oraı Batys Qazaqstan oblysynyń jylnamasy jaryq kórdi
Batys Qazaqstan oblysynyń ákimi Altaı Kólginovtiń alǵysózimen eki tilde jaryq kórgen hronologııalyq kitapta elimiz táýelsizdik alǵannan bergi kezeńdegi óńirdiń basty oqıǵalary qamtyldy. Atalmysh jylnamadan oqyrman Aq Jaıyq óńiriniń táýelsizdik tusyndaǵy tarıhyn, oblystyń qoǵamdyq-saıası jáne mádenı ómirindegi mańyzdy oqıǵalardy, óńirdiń áleýmettik-ekonomıkalyq damýyndaǵy jetistikterdi bile alady.
Tanystyrylym kezinde «Jaıyq Press» JShS bas dırektory Jantas Safýllınniń atap ótkenindeı, osy jınaqqa deıin sońǵy bes jylda óńir men Batys Qazaqstandaǵy baspasóz tarıhyna qatysty birneshe kitap jaryq kórdi. Olardyń ishinde buryn ǵylymı aınalymǵa enbegen tyń derekter barshylyq. Endi buǵan oblystyń shırek ǵasyr ishindegi shejiresi qosylyp otyr. Bul kitaptardy tarıhshylar, magıstrler men stýdentter zerttep, keregin ala alady. Aldaǵy jyly Batys Qazaqstan oblystyq «Oral óńiri» jáne «Prıýrale» gazetteriniń 100 jyldyǵyna oraı jańa jınaq pen Alash qaıratkeri, aqyn, aǵartýshy, oıshyl Ǵumar Qarashtyń qos tomdyǵyn shyǵarý oılastyrylýda.
Jıyn barysynda jylnamany qurastyrǵan tájirıbeli jýrnalıst Qalıolla Qaraǵoıshınge oblystyń qurmet gramotasy tapsyryldy.
«Jaıyq Press» JShS mekemesinde sondaı-aq jyl boıǵy jasalǵan jumystar qorytyndylanyp, úzdik qyzmetkerler atalyp ótildi. Zelenov aýdandyq «Aýyl tynysy» gazeti redaktsııasyna jańa avtokólik berildi. Oǵan qosa barlyq on eki aýdandyq gazettiń redaktsııalaryna kompıýterler, fotoapparattar men dıktofondar tabystaldy. 
