«Táýelsizdik tolǵaýy» ІІІ Respýblıkalyq baıqaýynyń qorytyndysy jeltoqsan aıynda Astanada shyǵarylady
ASTANA. 14 qarasha. QazAqparat - 2012 jyly 5 jeltoqsanda Astana qalasyndaǵy K. Baıseıitova atyndaǵy Ulttyq opera jáne balet teatrynda «Táýelsizdik tolǵaýy» ІІІ Respýblıkalyq baıqaýynyń qorytyndysy shyǵarylady.
2009 jyldan bastap jyl saıyn ótkiziletin konkýrstyń uıymdastyrýshysy - Qazaqstan Respýblıkasynyń Mádenıet jáne aqparat mınıstrligi.
Atalǵan vedomstvonyń málimetinshe, is-sharanyń basty maqsaty - zaman talabyna saı jańa qoǵamdyq-mańyzdy dramalyq jáne mýzykalyq shyǵarmalardyń jazylýyna jol ashý, otandyq avtorlardy qoldaý, respýblıka teatrlary men kontserttik uıymdary repertýarlaryn búgingi kúnniń talabyna saı kórkemdik deńgeıi joǵary jańa týyndylarmen tolyqtyrý, mádenıet salasyndaǵy memlekettik saıasatty júzege asyrý.
Búgingi kúni baıqaýdyń kelesi atalymdary boıynsha qazylar alqasynyń otyrysy ótti:
- jastar aýdıtorııasyna arnalǵan eń úzdik mýzykalyq-dramalyq kólemdi shyǵarma;
- qýyrshaq teatrlaryna arnalǵan eń úzdik dramalyq shyǵarma;
- qazaq halyq aspaptaryna (qobyz, dombyra, sybyzǵy) arnalǵan kishi kólemdi eń úzdik shyǵarma (kúı).
Baıqaýǵa belgilengen atalymdar sheńberinde jeke avtorlardyń nemese avtorlyq ujymdardyń buryn-sońdy oryndalmaǵan, jarııalanbaǵan jáne baıqaýǵa qatystyrylmaǵan shyǵarmalary qabyldandy. Mysaly, qazaq halyq aspaptaryna arnalǵan úzdik shyǵarma atalymy boıynsha 12 shyǵarma qazylar alqasynyń talqylaýyna salynsa, eń úzdik balalar áni atalymy boıynsha 10 shyǵarma sarapqa salynatyn bolady.
Qazylar alqasy shyǵarmalardy joǵary kórkemdik deńgeıi, janrlyq erekshelikteri, taqyrypty ashýdaǵy ózindiligi, avtordyń shyǵarmashylyq daralyǵy jáne sheberligi, shyǵarmanyń kórkemdik baıan etilýi krıterııleri boıynsha baǵalady.
15 qarashada Almaty qalasyndaǵy «Qazaqkontsert» ǵımaratynda horǵa arnalǵan eń úzdik shyǵarma, eń úzdik balalar áni nomınatsııalary boıynsha qazylar alqasynyń otyrysy ótedi.
