Táýelsizdik tiregi - Tatýlyq
ASTANA. QazAqparat - Jambyl óńiriniń basshysy, oblystyq Qazaqstan halqy assambleıasynyń tóraǵasy Kárim Kókirekbaevtyń tóraǵalyǵymen oblystyq Qazaqstan halqy assambleıasynyń kezekti XIX sessııasy ótti. «Kóne Taraz» tarıhı-mádenı ortalyǵyndaǵy «Dostyq» úıinde bolǵan shara «Qazaqstan Táýelsizdigi: kelisim men birliktiń 25 jyly» taqyrybyna arnaldy. Oǵan Assambleıa músheleri men ardagerleri, etnomádenı birlestik jetekshileri, qala, aýdan ákimderi, oblys jáne aýdandyq máslıhat hatshylary, mekeme, joǵary jáne arnaýly oqý oryndarynyń basshylary, qoǵamdyq kelisim keńesteriniń tóraǵalary men BAQ ókilderi qatysty, dep jazady «Aq jol» gazeti.
- Qurmetti sessııaǵa qatysýshylar! Bıylǵy jyl qoǵamdyq mańyzy bar eleýli oqıǵalarǵa toly boldy. Konstıtýtsııaǵa negizdelgen Parlament Májilisi men máslıhattar depýtattarynyń saılaýyn abyroıly túrde ótkizdik. Qazaqstan alǵash ret Birikken Ulttar Uıymynyń Qaýipsizdik Keńesiniń turaqty emes múshesi bolyp saılandy. El Prezıdenti Nursultan Nazarbaevtyń Beıbitshilik Manıfesi álemdik deńgeıdegi resmı emes qujat mártebesin aldy. Elimizdiń bolashaǵyn baıandy etetin «Máńgilik El» patrıottyq aktisi qabyldandy. Táýelsizdiktiń mereıli 25 jyldyq shejiresi osyndaı mańyzdy oqıǵalarmen eselendi. Bul - Elbasynyń ólsheýsiz eńbeginiń jemisi, elimizdiń jetistigi.
Qurmetti oblystyq assambleıa músheleri! Qadirli qonaqtar! Bir aıdan soń barsha qazaqstandyqtar eń qasterli mereke - Táýelsizdik kúnin atap ótedi. Táýelsizdiktiń baǵasyn biz barlyǵymyz bilemiz. Elbasy kórsetken týra jolmen talaı asýlardan óttik. Kedergilerge moıynsunbaı, keri shegingen joqpyz. Ultymyzǵa tán ulyqtyq pen uıysqan eldiń berekesin kórsete bildik. Qasıetti qazaq jeri taǵdyrdyń túrli tálkegimen toǵysqan etnostar úshin qutty meken boldy. Uly Dala eli ottan ystyq Otanyna aınaldy. Jas memleketimizdiń mereıli 25 jyly ishinde biz Elbasymen birge uly joldy júrip óttik. Eńseli memleket atanyp, kemeńger Kóshbasshysy bar tabysty elderdiń qataryna endik. Elýliktiń mejesin eńserip, otyzdyqqa qaraı qadam bastyq. Bunyń barlyǵy - maqsaty men múddesi ortaq arnaǵa toǵysqan, birligi jarasqan halqy bar, Táýelsiz Qazaqstannyń jetistigi. Basymyzǵa qonǵan baq qusyn baǵalaı bileıik.
Táýelsiz el bolýdy ańsaǵan ata-babalardyń oryndalǵan armanyn urpaqtan-urpaqqa amanat etýimiz qajet. Bizdiń kúshimiz - birlikte, qýatymyz - halqymyzda! «Máńgilik Eldiń» jeti tuǵyryn árdaıym qurmet tutyp, olardy nyǵaıtý - ortaq paryzymyz. Barlyǵyńyzdy Táýelsizdiktiń 25 jyldyq mereıtoıymen quttyqtaımyn! Elimiz aman, jurtymyz tynysh bolsyn! Yntymaǵy jarasqan elimizdiń abyroıy arta bersin, - degen Kárim Násbekuly Táýelsizdik jyldarynda oblysymyz ekonomıkalyq-áleýmettik, sport pen mádenıet salalarynda tolaıym tabystarǵa qol jetkizgenin, aýyz toltyryp aıtarlyqtaı ósý men órkendeýdi bastan keshirgenin maqtanyshpen aıtty. Jemisti de jeńisti jetistikterdiń barlyǵy da elimizdegi, oblystaǵy berik ornyqqan tatýlyq pen birliktiń, dostyq pen yntymaqtyń arqasy ekenin erekshe aıtyp ótken óńir basshysy aǵymdaǵy jyly oblystyq Qazaqstan halqy Assambleıasynyń bastamasymen ótken ıgi sharalardyń mán-mazmunyna toqtaldy. Sondaı-aq, ol óz sózinde óńirdegi túrli ulttardyń birligin saqtap, tatýlyǵyn nyǵaıtý jolynda uzaq jyldar boıy eńbek etken ardagerler qaýymy men Táýelsizdik jyldarynda eleýli eńbek etip kele jatqan oblys aýmaǵyndaǵy iri kásiporyn basshylaryn, óz sharýasyn shalqyta otyryp, el ekonomıkasynyń damýyna ekpin qosyp otyrǵan ózge ult ókilderi men jeke kásipkerlerdiń de esimin erekshe qurmetpen atap ótti.
Budan soń jaryssóz kezeginde sóz alǵan sheshender elimizdegi ultaralyq tatýlyqtyń nátıjeli túrde saqtalyp, Qazaqstan barshaǵa ortaq Otan, jyly uıa, qamqorshy bolyp otyrǵanyn tebirene jetkizdi. Aıtalyq, M.H.Dýlatı atyndaǵy TarMÝ-dyń birinshi prorektory Asqar Abdýaly óz sózinde azattyqtyń aq tańy atqaly Qazaqstan birlik pen kelisimdi damytýdyń jańa satysyna kóterilgenin jetkizdi.
- Bizdiń bul baǵyttaǵy jemisti jumystarymyz 2025 jylǵa deıin Qazaqstan halqy Assambleıasynyń damý jáne qazaqstandyq biregeılik pen birlikti nyǵaıtý men damytý tujyrymdamalaryn qabyldaýymyzdan kórinedi. Tujyrymdamalarda Elbasynyń Bes ınstıtýtsıonaldyq reformasy aıasynda «Máńgilik El» jalpyulttyq patrıottyq ıdeıasyn iske asyrý, azamattyq prıtsıpke negizdelgen birtektilik pen birlikti nyǵaıtý eń basty mindet retinde kórsetilgen. Qazaqstanda túrli mádenıetter men órkenıetter beıbit qatar ómir súrýiniń baı tarıhı tájirıbesi jınaqtalǵan. Bul óz kezeginde halyqtyń boıynda ortaq qundylyqtar baǵdarlary men etnosaralyq jáne konfessııaaralyq kelisim men syılastyqqa negizdelgen tózimdilik atmosferasyn qalyptastyrdy. Mine, Elbasymyz Qazaqstannyń etnomádenı jáne dinı kóptúrliligi - elimizdiń ortaq jetistigi men zor baılyǵy ekendigin únemi atap kórsetip otyr, - dedi A.Abdýaly. Al Qordaı aýdanynyń ákimi Qaırat Dosaev aýdandaǵy halyqtyń 47 paıyzy ózge ult ókilderi ekenin, olardyń dostyq qarym-qatynasy men yntymaǵy jarasyp, óńirdiń damýyna barlyǵy birkisideı atsalysyp kele jatqanyn tilge tıek etti.
Sonymen qatar, Analar keńesiniń múshesi Álııa Kebegenova óziniń kóp ultty balalardyń anasy atanǵanyn maqtanyshpen jetkizdi.
- Joldasym Ǵalym Arystanbaev ekeýmiz ózimizdiń úsh perzentimizben qatar, balalar mektep-ınternatynan bes balany baýyrymyzǵa basyp, tárbıelep otyrmyz. Beseýi bes túrli ulttyń ókili bolsa da, búldirshinder qazir bir atanyń balasyndaı baýyrmal, syılas bolyp ósip keledi. Bizdi áke, ana dep ataıdy. Biz de olardy óz balalarymyzdaı jaqsy kóremiz, - dedi jas kóp balaly ana aǵynan jaryla.
Táýelsizdik qurdasy, tatar ultynyń ókili Rınal Rahmatýllınniń júrekjardy sózderi de kópshilikti tebirentti.
Kún tártibinde qaralǵan ekinshi másele boıynsha Qazaqstan halqy Assambleıasyna múshelikke kandıdattar tizimi men oblystyq Qazaqstan halqy Assambleıasynyń basshylyǵy men quramy bekitildi.
Basqosý sońynda halyqtar dostyǵy men tatýlyqtyń jolynda, birlik pen yntymaqty arttyrý maqsatynda aıanbaı eńbek etip, memlekettik saıasatty júrgizýge atsalysyp júrgen birqatar azamattar Qazaqstan halqy Assambleıasynyń qoǵamdyq «Birlik» altyn medalimen, Qurmet gramotasymen, Alǵys hatymen jáne oblys ákiminiń Qurmet gramotasymen marapattaldy.
