Táýelsizdik tartýy: Aqmola oblysynda jańa kitaphana ashyldy

KÓKShETAÝ. QazAqparat - El Táýelsizdiginiń 30 jyldyǵyn merekeleý qarsańynda Býrabaı kentinde qaıta jóndelgen aýyldyq kitaphanasy esigin aıqara ashty. Mádenıet oshaǵyna «Úlgili aýyl kitaphanasy» degen jańa mártebe berildi, dep habarlaıdy QazAqparat tilshisi oblystyq ishki saıasat basqarmasyna silteme jasap.

Aqmola oblystyq mádenıet, arhıvter jáne qujattamalar basqarmasynyń málimetinshe, aǵymdaǵy jóndeý jáne jobalaý jumystarynan keıin kitaphananyń materıaldyq-tehnıkalyq bazasy zamanaýı jabdyqtar men jıhazdar, jańa kompıýterlik tehnıkamen tolyqty. Kitap qory da aıtarlyqtaı jańartyldy.

Kitaphanada 30 oryndyq oqý zaly, merzimdi basylymdar zaly, kovorkıng-ortalyq, mádenı-saýyq ortalyǵy, «Parasat joly» ortalyǵy, «Mobıldi kitaphana» buryshy, balalar zaly bar.

«Býrabaı kentiniń modeldi kitaphanasy yńǵaıly, jaıly boldy, qonaqtar úshin – ashyq qorlar, elektrondyq resýrstar, tegin Wi-Fi, osynyń barlyǵy turǵyndarǵa rýhanı azyq alýǵa múmkidik beredi», - dedi vedomstvodan.

Sharada Býrabaı aýdandyq máslıhatynyń hatshysy Málıka Nurpanova, Aqmola oblystyq mádenıet, arhıvter jáne qujattamalar basqarmasynyń basshysy Aıgúl Sábıtova, Maǵjan Jumabaev atyndaǵy Aqmola oblystyq ámbebap ǵylymı kitaphanasynyń dırektory Qudaıberli Myrzabek, Býrabaı aýdanynyń mádenıet bóliminiń basshysy Dámesh Qarsybaeva, sondaı-aq qoǵam qaıratkerleri men kitaphana isiniń ardagerleri sóz sóılep, aýyl turǵyndary men kitaphana oqyrmandaryn qýanyshtaryn quttyqtady.

Aıta keteıik, Aqmola oblysynda 331 memlekettik kitaphana jumys isteıdi, onyń 289-y aýylda. Táýelsizdik jyldary oblysta 123 kitaphana ashyldy.