«Táýelsizdik: Sóz ben sýret» onlaın baıqaýy bastaldy

NUR-SULTAN. QazAqparat – QR Táýelsizdiginiń 30 jyldyǵyna oraı Qaraǵandy oblysy ákimdigi mádenıet, arhıvter jáne qujattama basqarmasynyń qoldaýymen «Mádenıet portaly» aqparattyq agenttiginde tuńǵysh ret ótkizip jatqan «Táýelsizdik: Sóz ben sýret» atty aqyndar men sýretshiler arasyndaǵy respýblıkalyq onlaın baıqaý jarııalandy.

Baıqaýdyń júlde qory - 7 600 000 teńge.

Bul jobanyń negizi maqsaty – elimizdegi sýretshiler men aqyndardyń shyǵarmalaryn nasıhattaý, olardyń týyndysy arqyly Qaraǵandy oblysynyń tarıhı tulǵalaryn, mádenı eskertkishterin, sakraldy oryndaryn, tabıǵatyn, Táýelsizdik kezeńinde ólsheýsiz úles qosqan tulǵalardyń esimin asqaqtatý, poezııa men sýret óneriniń úndestigin baǵalaý ári baǵamdaý, oqyrman qaýymnyń moderndik ortasyn qalyptastyrý.

Baıqaýdyń ereksheligi – óner saıysyna qatysýshy aqyndar men sýretshilerdiń jas ereksheligine shekteý qoıylmaıdy, ıaǵnı kez kelgen jastaǵy shyǵarmashylyq tulǵa qatysa alady.

Onlaın baıqaý qazaq jáne orys tilinde ótedi. Baıqaýǵa respýblıkanyń barlyq oblystary pen megapolısterindegi sýretshiler men aqyndar shyǵarmalaryn «Mádenıet portalyna» onlaın túrde óz qolymen tirkeı alady. Ol úshin úmitkerler «Mádenıet portalyna» tirkelip, buryn esh jerde jarııalanbaǵan, konkýrsqa usynylǵan shyǵarmalary men jeke málimetterin portalda kórsetilgen «Shyǵarmany qosý» batyrmasy arqyly ornalastyrýy kerek. Sonymen qatar onlaın baıqaýdyń basqa da sharttaryn erejeden oqýǵa bolady.

Jeńimpaz aqyndardyń óleńderi qazaq, orys jáne aǵylshyn tilderine aýdarylyp, sýretshilerdiń kartınalarynan arnaıy albom daıyndalady. Jeńimpazdardyń shyǵarmalarynan quralǵan atalmysh albom aǵylshyn jáne orys tildi memleketterdiń ulttyq kitaphanalaryna joldanady. Munymen qosa albom arnaıy túsirilgen beınerolıkterge silteme berilgen QR kodpen jaryq kórmek.

Onlaın baıqaý 2 kezeńmen ótedi: Birinshi kezeń – sýretshiler úshin; 2-kezeń –aqyndar úshin. Baıqaýdyń sýretshilerge arnalǵan 1-kezeńi 20 sáýir men 20 maýsym aralyǵynda ótedi. Jeńimpaz 8 sýretshi anyqtalyp, úzdik 8 kartına jarııalanady. 26 maýsym men 26 shilde aralyǵynda ótetin baıqaýdyń aqyndarǵa arnalǵan 2-kezeńinde úzdik 8 sýrettiń bireýin tańdap, sol sýret týraly 1 poezııalyq shyǵarmasyn (óleńin) joldaý arqyly qatysa alady.

Jeńimpazdardyń júldeleri tómendegideı tabys etiledi:

Eki Bas júlde /aqyn men sýretshiniń árqaısysyna/ teń bólinedi – 2 000 000 tg

Eki І oryn /aqyn men sýretshiniń árqaısysyna/ teń bólinedi – 1 600 000 tg

Tórt ІІ oryn /aqyn men sýretshiniń árqaısysyna/ teń bólinedi – 2 000 000 tg

Alty ІІІ oryn /aqyn men sýretshiniń árqaısysyna/ teń bólinedi – 1 800 000 tg

Eki yntalandyrý syılyǵy /aqyn men sýretshiniń árqaısysyna/ teń bólinedi – 200 000