Táýelsizdik saraıynyń mańynan kúdik týǵyzatyn qorap tabyldy degen telefon qońyraýy Astananyń barlyq jedel qyzmetterin aıaǵynan tik turǵyzdy
ASTANA. 23 qarasha. QazAqparat - Táýelsizdik saraıynyń artyndaǵy transformator kúrkesinde bombasy bar degen kúdikti qaǵaz qoraptyń tabylǵandyǵy týraly soǵylǵan telefon qońyraýy dúısenbi kúni Astanadaǵy jedel qyzmettiń barlyǵyn aıaǵynan tik turǵyzdy.
Bul týraly QR Tótenshe jaǵaılar mınıstrliginiń baspasóz qyzmeti habarlap otyr.
Saǵat keshki 22.05-te Tótenshe jaǵdaılar departamentine kúrke ishinde kúdikti qoraptyń tabylǵandyǵy týraly aqparat kelip túsedi.
Arnaıy is-sharalar barysynda jarylǵysh zat tabylǵan joq. Qaza tapqandar men zardap shekkender joq, dep tolyqtyrdy TJM baspasóz qyzmeti.
Tótenshe jaǵdaıdy joıý úshin jedel is-áreket etý qyzmetiniń 38 adamy men 7 tehnıkasy, sonyń ishinde Astana qalasy TJD jeke quramyndaǵy 21 adamy men 2 tehnıkasy, sondaı-aq «Ortalyq aımaqtyq aeromobıldi jedel-qutqarý jasaǵy» MM 4 adamy men 1 tehnıkasy jumyldyryldy.
