Táýelsizdik saraıynyń laýazymdy tulǵalary jemqorlyq úshin sottaldy
ASTANA. 11 qazan. QazAqparat - Aǵymdaǵy jyldyń basynan beri elordada departamenttiń ózi 100-ge jýyq sybaılas jemqorlyq qylmystaryn anyqtady. Bul týraly búgingi semınar-dáriste QR Ekonomıkalyq jáne sybaılas jemqorlyqqa qarsy kúres agenttiginiń Astana qalasy boıynsha departamentiniń ókili, maıor Andreı Grechko málim etti.
Onyń habarlaýynsha, bıyl salyq, ishki ister, tótenshe jaǵdaılar, qylmystyq atqarý, halyqty áleýmettik qorǵaý, sot-medıtsına saraptamasynyń qyzmetkerleri, sondaı-aq «Parasat» ulttyq holdıngi sııaqty mekemelerdiń mamandary jemqorlyq úshin ustaldy. «Sonyń ishinen iri degen qylmystarǵa toqtalatyn bolsaq, «Astana - jańa qala» arnaıy ekonomıkalyq aımaqtaǵy bastyqtyń orynbasary Áýbákirov 26,3 mln. teńge kóleminde para alǵany úshin quryqtaldy. Sol sııaqty «Táýelsizdik saraıy» memlekettik mekemesiniń laýazymdy tulǵalary da quqyq buzýshylyqqa jol bergen. Olar memlekettik satyp alýlar barysynda 500 myń teńgedeı para aldy. Qazirgi kezde dırektordyń qarjy boıynsha orynbasary jáne memlekettik satyp alýlar bóliminiń bastyǵy sottaldy», - deıdi A.Grechko. Aıta keteıik, Astanadaǵy Táýelsizdik saraıynda respýblıkalyq jáne halyqaralyq mańyzy bar is-sharalar ótip turady.
