«Táýelsizdik» pen «Nazarbaev» – egiz uǵym» - respýblıkalyq basylymdarǵa sholý
ASTANA. 9 jeltoqsan. QazAqparat - Qazaq aqparat agenttigi respýblıkalyq basylymdarda 9 jeltoqsan, beısenbi kúni shyqqan ózekti materıaldarǵa sholýdy usynady.
***
«Aıqyn» gazetiniń beısenbilik nómirinde «Táýelsizdik» pen «Nazarbaev» - egiz uǵym» degen taqyryppen maqala jarııalandy. Maqalada 1991 jyly 16 jeltoqsanda Qazaqstan Respýblıkasynyń Joǵarǵy Keńesinde Elbasymyz N. Nazarbaevtyń usynysymen «Qazaqstan Respýblıkasynyń Táýelsizdigi týraly» Konstıtýtsııalyq zańnyń qabyldanǵan sátine kýá bolǵan senator Qýanysh Aıtahanov pen «Táýelsizdik úshin kúres endi bastaldy» degen ustanymnyń basynda júrgen saıasattanýshy Dos Kóshimniń pikirleri berilgen. «Bul asa zor tarıhı oqıǵa árbir otandasymyzdyń sanasynda saltanatty kún bolyp qaldy. Jaqsy kún jarqyn jalǵasyn tapty. Tarıh úshin kózdi ashyp-jumǵandaı ǵana qysqa merzimde, on toǵyz jylda mundaı dárejege jetken qandaı memleket bar? Táýbe deıik Táýelsizdigimizge! Nursultan Ábishulynyń sol kezeńnen bastap, kúni búginge deıin jasampazdyqpen júrgizip kele jatqan syndarly saıasaty elge, ultqa, Otanǵa adal qyzmet etýdiń jarqyn mysaly. Janqııarlyqtyń úzdik úlgisi», - deıdi Q. Aıtahanov.
Al D. Kóshimniń pikirinshe, Táýelsiz memlekettiń jumysy Táýelsizdik úshin kúresken azamattardy qurmetteýden bastalýy kerek. Sol iltıpatty kórip ósken, Táýelsizdiktiń qandaı qıyndyqtarmen kelgenin túısingen jastar óz eliniń Táýelsizdigin qorǵaýǵa kúsh salady. Qazaq jurty óz azattyǵy úshin 300 jyl boıy kúres júrgizgenin jas urpaq esinen bir sát te shyǵarmaýy tıis. Bul úshin bizde Syrym batyrdyń, bolmasa Kenesary hannyń eń iri kóterilis jasaǵan kúni sııaqty mańyzdy datany «Táýelsizdik úshin kúres kúni» dep jarııalaýymyz kerek.
Sondaı-aq «Aıqyn» gazetiniń búgingi sanynda «Malaızııada maqtanatyn qazaqtar bar nemese shalǵaıdaǵy elde memlekettik tildegi gazet qalaı shyǵyp jatyr?», degen taqyryppen maqala basyldy. «Malaızııadaǵy «Limkokwing» ýnıversıteti magıstratýrasynyń túlegi, «KMB Group» jaýapkershiligi shekteýli seriktestiginiń dırektory Merýert Nurahmet keshe redaktsııamyzǵa arnaıy kelip, Malaızııada jaryq kóre bastaǵan «MyKaz» gazeti týraly áńgimelep berdi», delingen maqalada. Bul jaıynda tolyq bilgińiz kelse gazettiń búgingi nómirin jiberip almańyz.
***
«Alash aınasy» gazetiniń jazýynsha, keshe «KAZENERGY» Qaýymdastyǵynyń tóraǵasy, Boks federatsııasynyń prezıdenti Tımýr Qulybaev Gýanchjoýda ótken jazǵy Azııa oıyndarynda bokstan jeńimpaz jáne júldeger bolǵan sportshylar men olardy daıyndaǵan bapkerlerdi qabyldap, el namysyn qorǵaǵan azamattarǵa laıyqty qurmet kórsetti. «Qıyn básekede elimizdiń týy jelbirep, ánuranynyń shyrqalýyna sebep bolǵan sportshylarymyz ben bapkerlerdiń mańdaı teri desek te bolady. Jumysymyzdyń durys baǵytta kele jatqanyn kórip otyrmyz. Biz sportshylarymyz ben bapkerlerimizdiń jumysyn budan ári qaraı da qoldaımyz», - dep atap kórsetken T. Qulybaev marapattaý rásiminde. Maqala «Federatsııa Azııa júldegerlerine syıaqy berdi», degen taqyryppen jarııalandy.
***
Sonaý yqylym zamandarda Túrki qaǵanaty degen atpen belgili bolyp, álemdik órkenıette oıyp oryn alǵan Kók Túrkilerdiń Eýrazııa qurlyǵyna órken jaıǵan urpaqtary búginde tegin izdep, týystyq birligin kúsheıtý arqyly yntymaǵy uıysqan tutastyqqa umtylýda. Mundaǵy maqsat - Túrki mádenıetiniń álemdik órkenıetke buǵan deıin qosqan, qosyp jatqan baı murasyn nasıhattap, birligimizdi pash etý. 2009 jyldyń qazan aıynyń 2-sinde Ázerbaıjannyń Nahychvan qalasynda ótken Túrkitildes memleketterdiń 9-sammıtinde Túrki tildes elderdiń Yntymaqtastyq keńesin quryp, sonyń aıasynda Túrki dúnıesiniń Aqsaqaldar keńesin jasaqtaý týraly qabyldanǵan sheshim osyndaı ıgi maqsatqa talpynystyń bastapqy qadamy bolǵan edi. Osy oraıda «Alash aınasy» gazetiniń búgingi sanynda «Túrki jurtynyń tutastyǵyna Aqsaqaldar keńesi jaýap bermek», degen taqyryppen maqala jarııalandy. Maqalaǵa taıaýda elordada ótken Túrki tildes elderdiń Aqsaqaldar keńesiniń alǵashqy otyrysy arqaý bolǵan.
***
«Keshe Aqordada Memleket basshysy Nursultan Nazarbaev Reseı Federaldyq jınalysy Federaldyq Keńesiniń tóraǵasy Sergeı Mıronovty qabyldady», dep jazady «Kazahstanskaıa pravda» gazeti. Basylymnyń atap ótýinshe, áńgime barysynda eki jaqty yntymaqtastyqtyń keń aýqymdy máseleleri, sondaı-aq halyqaralyq kún tártibindegi máseleler talqylandy. «Qazaqstan Prezıdenti Nursultan Nazarbaevpen áńgimelesý barysynda bizdiń elderimiz arasyndaǵy eki jaqty qarym-qatynastardyń ártúrli máseleleri boıynsha pikir almastyq. Biz sondaı-aq TMD aýmaǵyndaǵy Biryńǵaı ekonomıkalyq keńistik qurý máselesin talqyladyq. Nursultan Ábishuly Astanadaǵy EQYU-nyń Sammıti kezinde Qazaqstan tarapynan atqarylǵan jumystar týraly aıtty. Sizderdiń eldiń kúsh-jigeriniń arqasynda ótken sammıt Eýropadaǵy qaýipsizdik jáne yntymaqtastyq uıymyn jańa ómirge bastady. Men Prezıdentti joǵary deńgeıdegi osy kezdesýdiń tabysty ótýimen quttyqtadym. Sonymen qatar, men Nursultan Nazarbaevpen shyn máninde óziniń arhıtektýralyq ásemdigimen súısintetin elorda - Astana týraly óz áserimdi bólistim», - dep atap ótken kezdesýden keıingi brıfıngte S.Mıronov.
