Táýelsizdik merekesine oraı Túrkistan oblysynda 60 otbasy baspanaly boldy
Táýelsizdik kúni merekesi men Tólebı aýdanynyń qurylǵanyna 90 jyl tolýyna oraı Lengir qalasynda 3 kópqabatty turǵyn úı paıdalanýǵa berilip, áleýmettik osal toptar sanatyndaǵy 60 otbasy baspanaly boldy.
Jańa qonys ıelerin Túrkistan oblysynyń ákimi Darhan Satybaldy quttyqtady.
«Táýelsizdik alǵan 31 jyl ishinde memleketimizde aýqymdy jumystar atqaryldy. Azattyqtyń arqasynda aýyldardy damytýǵa múmkindik týdy.
Osy ýaqyt ishinde bir ǵana Tólebı aýdanynda memleket esebinen 30-ǵa jýyq kópqabatty turǵyn úıdiń qurylysy júrgizilip, 1 500 otbasy qonys toıyn toılady. Osynyń bári – halyqtyń ál-aýqatyn arttyrýǵa baǵyttalǵan salıqaly saıasattyń jemisi. Memleket basshysy Qasym-Jomart Kemeluly Toqaev turǵyndardy baspanamen qamtýdy basty nazarda ustaıdy. Bul baǵyttaǵy jumystar jalǵasa beredi», – dedi Darhan Satybaldy.
Tólebı aýdanynyń qurylǵanyna 90 jyl tolýyna oraı aýdan ortalyǵynda Tóle bıdiń eńseli eskertshi ashyldy. «Tólebı baba» saıabaǵynda ornalasqan bıiktigi 23 metr bolatyn mys eskertkish demeýshi Áset Qaıypbekovtyń esebinen jasalǵan. Músin salmaǵy — 25 tonna.
Mereıtoıda «ETNO – AYYL» alańyndaǵy ulttyq sport oıyndarynan saıys ótti. Kıiz úıler tigilip, halyq ánderi shyrqaldy. El aǵalary eldi birlikke shaqyratyn oılaryn aıtyp, keńes qurdy. Jergilikti kásipkerlerdiń taýar kórmesi uıymdastyryldy.
