Táýelsizdik merekesine oraı Almatyda qandaı nysandar ashyldy

ALMATY. QazAqparat - Almaty ákimi Baqytjan Saǵyntaev «Almaty» telearnasynyń tikeleı efırinde Almatydaǵy áleýmettik, óndiristik jáne ınfraqurylymdyq jańa nysandar týraly aıtyp berdi, dep habarlaıdy QazAqparat tilshisi.

Qala ákiminiń aıtýynsha, Táýelsizdiktiń 30 jyldyǵyna oraı Almatyda birqatar óndiristik, áleýmettik jáne ınfraqurylymdyq nysandar ashyldy.

«Máselen, Rysqulov dańǵyly men Emtsov kóshesiniń qıylysynda kópten kútken jolaıyryq, Abaı dańǵyly boıymen Momyshuly kóshesinen Alataý kóshesine deıin, odan ári qalanyń batys shekarasyna deıin ótpeli kólik qozǵalysy ashyldy. Indýstrıaldy aımaqta úlken dıametrli bolat dánekerlengen qubyrlar shyǵaratyn zaýyt iske qosyldy. Budan basqa, Alataý aýdanynda ındýstrıaldy aımaq nysandarynyń órt qaýipsizdigin qamtamasyz etetin jańa zamanaýı órt sóndirý deposy ashyldy. Sondaı-aq, Alataý aýdanynda B. Momyshuly kóshesiniń batysyna qaraı jelili jańa saıabaq salynyp, 107,1 ga alańda 600-ge jýyq túrli aǵash otyrǵyzyldy»,- dedi Baqytjan Saǵyntaev.

Áleýmettik nysandardyń ishinen qala ákimi Naýryzbaı aýdanynyń №36 emhanasy janynan zamanaýı KT-apparaty bar dıagnostıkalyq ortalyqtyń, Áýezov aýdanyndaǵy №186 balabaqshanyń kúrdeli jóndeýden ótip, seısmıkalyq kúsheıtilip, jalǵa berýden qaıtarylyp ashylǵanyn atap ótti.

«Aldaǵy kúnderi taǵy da birqatar nysandy ashý josparlanyp otyr. Naýryzbaı jáne Áýezov aýdandarynda Nur Otan partııasynyń aýdandyq fılıaldarynyń jańa ǵımarattary ashylady. Naýryzbaı aýdanynda №7 QKA qabyldaý bólimshesiniń jańa korpýsy da iske qosylady. Alataý aýdanynyń Tomırıs jáne Naýryzbaı aýdanynyń Qalqaman yqsham aýdandarynda jańa mektepter, Jetisý aýdanynda eki jańa DSK paıdalanýǵa beriledi»,- dedi qala basshysy.

Sondaı-aq, Baqytjan Saǵyntaev «Saryarqa» jáne «B.Momyshuly» metro stantsııalarynyń jaqyn arada tehnıkalyq iske qosylatynyn eske saldy.

Budan basqa, halyqtyń áleýmettik osal toptarynan 211 otbasy «Nurly jer» memlekettik baǵdarlamasy aıasynda osy aýdandaǵy «Mádenıet» kesheninen páter kiltin aldy.

Jaqynda 29 jasqa deıingi jumys isteıtin jastar da jańa qonysyn toılady. Osy sanattaǵy almatylyqtarǵa barlyǵy 1 050 páter bólinedi.

Qalalyq «Almaty jastary» jeńildetilgen nesıe baǵdarlamasy boıynsha 926 nesıe berildi. Kópbalaly otbasylarǵa satyp alý quqyǵynsyz 267 jaldamaly páter bólindi.

B. Saǵyntaev jalpy bıyl kezekte turǵan 5 394 adamnyń páter alatynyn, onyń ishinde «Baqytty otbasy» respýblıkalyq baǵdarlamasy aıasynda kópbalaly, tolyq emes jáne múgedek balalardy tárbıelep otyrǵan otbasylar úshin 1 013 kredıttik zaem, «Shańyraq» baǵdarlamasy boıynsha kezekte turǵandardyń barlyq sanattary úshin 2146 kredıttik qaryz beriletinin atap ótti.