«Táýelsizdik merekesin ótkizip almaıynsha, Jańa jylǵa daıyndyq jumystaryna shekteý qoıý kerek pe?» - respýblıkalyq basylymdarǵa sholý

***

«Egemen Qazaqstan» gazetiniń málim etýinshe, keshe Qazaqstan Respýblıkasynyń Premer-Mınıstri Kárim Másimov Táýelsiz Memleketter Dostastyǵyna múshe elder Úkimet basshylary keńesiniń jáne Eýrazııalyq ekonomıkalyq qoǵamdastyqtyń Memleketaralyq keńesiniń kezekti otyrystaryna qatysý úshin Sankt-Peterbor qalasyna keldi. «Úkimet basshylary keńesiniń otyrysynda erkin saýda aımaǵy týraly kelisimniń jobasyn daıyndaý barysy men TMD elderiniń ınnovatsııalyq qyzmettestiginiń memleketaralyq maqsatty baǵdarlamasynyń jobasyn ázirleý máseleleri talqylandy. Sol sııaqty zııatkerlik menshikti quqyqtyq qorǵaý, halyqty sapaly medıtsınalyq qyzmetpen qamtamasyz etý máseleleri de jan-jaqty áńgime arqaýyna aınaldy. Zııatkerlik menshikti qorǵaý turǵysynda tıisti memleketaralyq keńes qurý jaıy da sóz boldy. Sonymen birge, otyrysta 2011-2012 jyldarǵa arnalǵan gýmanıtarlyq qyzmettestik salasyndaǵy is-sharalardyń basymdyqqa ıe josparlary, TMD-ǵa múshe elderdiń óndirisin jáne energııa resýrstardy tutynýyn boljaý máseleleri tóńireginde de keńinen áńgime órbidi», dep jazady basylym. Úkimet basshysynyń sapary jaıynda egjeı-tegjeıli bilgińiz kelse, basylymnyń senbilik sanyndaǵy «Yqpaldastyq baǵytyndaǵy jańa qadamdar» degen taqyryptaǵy maqalaǵa nazar salyńyz.

«Qazaqstan Respýblıkasynyń Prezıdenti Nursultan Nazarbaev keshe Portýgalııanyń astanasy - Lıssabon qalasynda bastalǵan NATO sammıtine qatysý úshin osy elge kelgen bolatyn. Jalpy, atalǵan aýqymdy ári mańyzy aıtarlyqtaı halyqaralyq basqosýǵa 28 memlekettiń basshylary men joǵary laýazym ıeleri jınalyp otyr», dep jazady «Egemen Qazaqstan» gazeti «Basty taqyryp Aýǵanstan bolǵaly tur» degen maqalasynda. Basylymnyń baıandaýynsha, NATO aldynda turǵan qazirgi kezdegi qyr kórsetýlerdiń biri Iran bolyp eseptelse, al basqosýdyń basty taqyryby Aýǵanstan bolǵaly tur. Alıans elderiniń kóshbasshylary sammıtke arnaıy shaqyrylǵan Aýǵanstan prezıdenti H.Karzaımen birge eldi basqarý tizginin jergilikti bılikke berý máselesin talqylaıdy dep kútilýde. Sóıtip, búginde 150 myń adamdy quraıtyn bitimgershiler kúshi 4 jyldyń ishinde birte-birte el aýmaǵynan tolyq shyǵarylýy tıis. Sammıtte sondaı-aq NATO men Reseı qarym-qatynasy máselesi qaralatyny da belgili bolyp otyr.

***

«Aıqyn» gazetiniń dástúrli «Aq sóıle!» aıdarynyń qonaǵy - qoǵam qaıratkeri Arynbaı Bekbosynmen aradaǵy suhbat «Sammıt - Qazaqstan mereıin asqaqtata túsedi» degen taqyryppen jaryq kórdi. Basylym tilishisiniń barlyq saýaldaryna tuşymdy jaýap bergen qoǵam qaıratkeri: «Iá, Alla qalasa, jeltoqsannyń basynda Elordamyzda Prezıdent Nursultan Nazarbaevtyń zamanǵa úılesimdi, ıkemdi de kóregen saıasatynyń, orasan qajyr-qaırat jumsaýynyń jáne álemdik zor bedeliniń arqasynda dúnıe júzindegi eń áleýetti elder basshylary bas qosyp, kúlli adamzat taǵdyrymen tamyrlas asa ózekti de ótkir máselelerdi sarapqa salǵaly otyr. Soǵan oraı qazirde qaı-qaısymyz bolsaq ta óte bir mereıli shaqtardy bastan keshirý halindemiz. Desek te, ádette kez kelgen uly is, ulaǵatty oqıǵalardyń barsha baǵasy, parqy ýaqyt óte kele tereńirek paıymdalyp, oı-sanada ári salmaqtanyp, ári zoraıa túsedi. Aldaǵy Sammıt te sondaılar qataryna jatary esh kúmánsiz, aıdan anyq», - deıdi.

«Elebekovtiń eskertkishine bólingen 20 mln. teńge qaıda?». Osy taqyryppen «Aıqyn» gazetinde jarııalanǵan maqalada 2004 jyly halyq ártisi Júsipbek Elebekovtiń 100 jyldyq mereıtoıyna oraı respýblıkalyq estrada-tsırk kolledjiniń aldyna eskertkish qoıý úshin sol kezdegi Almaty qalasynyń ákimi Vıktor Hrapýnovtyń arnaıy qaýlysy shyǵyp, qala qazynasynan 20 mln. teńge bólgendigi, alaıda mejeli mekemege jetpegen sol aqshanyń qaıda ketkeni kúni búginge deıin belgisiz bolyp otyrǵandyǵy jaıynda jazylǵan. Basylymnyń atap ótýinshe, qarjy joq dep qol qýsyryp otyrýdy ar sanaǵan, ónerde bite qaınasyp júrgen búkil ónerli azamattar bas qosyp, qaıyrymdylyq shara ótkizbekshi. «Qaıran, Júsekem» dep atalatyn qolyna qara dombyra ustap, dástúrdi dáriptegen ánshilerdiń alǵashqy kontserti 22 qarasha kúni «Qazaqkontsert» zalynda júzege asady. Al estrada ókilderi 24 qarasha kúni memlekettik tsırktegi ekinshi kontsertten túsken qarjyny tutastaı aýdarýǵa qulshynys tanytqan.

***

Kelesi jyly Táýelsizdigimizdiń 20 jyldyǵyn atap ótkeli otyrmyz. Biz úshin bul merekeniń ózge toılardan jóni tipti bólek. Desek te, Táýelsizdik kúni Jańa jyl merekesi qarsańyndaǵy jan-jaqty sharalardyń kóleńkesinde qalyp qoıyp jatatyn syńaıly. Bul másele burynnan beri aıtylyp kele jatsa da, joǵarydaǵy tıisti oryndar tarapynan tıisti sharalar qolǵa alynǵan emes. Osyǵan oraı «Alash aınasy» gazeti «Oı-kókpar» aıdarynda «Táýelsizdik merekesin ótkizip almaıynsha, Jańa jylǵa daıyndyq jumystaryna shekteý qoıý kerek pe?» degen saýaldy talqyǵa salyp otyr. Qoǵam qaıratkeri Hasen Qoja-Ahmet pen saıasattanýshy Aıdos Sarymnyń bir-birine kereǵar pikirlerimen tanys bolǵyńyz kelse, basylymnyń senbilik nómirine nazar salyńyz.

«Jezqazǵan qalasynyń ákimi Berik Ábdiǵalıev myrza «qazir «Qazaqmys» túshkirip qalsa, barlyǵymyz aýyrýǵa daıyn turamyz» dep, aşy bolsa da bir shyndyqtyń betin ashqan bolatyn. Bul búgin týyndaǵan áńgime emes, qanshama jyldan beri «mys taýsylsa, kúnimiz ne bolmaq?» degen oı qala turǵyndarynyń tún uıqysyn buzyp, úreıin ushyryp keledi. Shyndyǵynda, Jezqazǵannyń jerasty baılyǵynyń túgesilýine qansha qaldy? Qazaqstannyń qaq júregindegi qala Kentaý, Arqalyqtyń kúıin keship, qańyrap qalmaq pa?» dep jazady «Alash aınasy» gazeti. Jarıaılanymda jazylǵan jaıdyń baıybyna barǵyńyz kelse, búgingi nómirdegi «Mysty qalanyń mysy basylyp qala ma?» degen maqalany oqyńyz.

«EQYU sammıtiniń qonaqtaryn qabyldaıtyn elordalyq meıramhanalar shuǵyl túrde as mázirlerin qaıta jazýda. Budan bylaı qazaq ulttyq taǵamdaryna basymdyq beriledi», dep jazady «Ekspress-K» gazeti. Osyǵan oraı arnaıy jýrnalıstik zertteý júrgizgen basylym bul jaıttyń shyndyq ekendigine kóz jetkizgen. Іri meıramhana ókilderiniń atap ótýinshe, sheteldikter jergilikti ulttyq taǵamdarǵa tapsyrysty kóp beredi eken.