Táýelsizdik qurdasy – polıtsııa ınspektory bul mamandyqty tańdaǵanyna ókinbeıdi
29 jastaǵy polıtsııa kapıtany Rınat Omarov Petropavldaǵy №3 polıtsııa bóliminde ýchaskelik ınspektor bolyp eńbek etedi. Іshki ister organdarynda 6 jyldyq eńbek ótili bar jigit búginde oblys ortalyǵyndaǵy eń tynyshsyz aýdandardyń birinde tártipti saqtaıdy.
«Vokzal mańy aýdanynyń óz erekshelikteri bar. Bul jerden kelip-ketýshiler kóp. 50-ge jýyq páter jalǵa beriledi. Túngi tekseris kezinde túrli oqıǵalarǵa tap bolyp jatasyń. Ásirese ishimdik ishken adamdarmen daýly sátter jıi týyndaıdy. Buryn olardyń kinásin dáleldeý qıynǵa soǵatyn. Qazir beınetirkegishterdiń arqasynda jumysymyz jeńildedi. Beınejazbany ákimshilik materıalǵa tirkeýge bolady», - deıdi Rınat Omarov.
Qyzmetkerdiń aıtýynsha, ýchaskelik polıtsııa ınspektorynyń negizgi mindeti turǵyndarmen baılanys ornatyp, olardyń jaǵdaıynan habardar bolý, qajet kezinde kómektesý.
«Meniń aýdanymda da zeınetkerler, túrli sala mamandary turady, temirjolshylar qonystanǵan. Árıne, janjal shyǵarýshylar, buzaqylar jáne buryn sottalǵandar da bar. Olardyń árqaısysymen jeke profılaktıkalyq jumys júrgiziledi. Tártipke salynǵandary da bar. Osyndaı bir janjalqoıǵa sot alkogol ishýge tyıym saldy. Talaptardy oryndamasa ákimshilik qamaýǵa alynýy múmkin edi. Nátıjesinde er adam ómir súrý saltyn ózgertti. Búginde múgedek anasyna qamqor», - deıdi polıtsııa kapıtany.
Rınat Omarovtyń aıtýynsha, sońǵy jyldary ýchaskelik polıtsııa ınspektory bolyp jumys isteý jeńildegen.
«Bıyl Іshki ister mınıstri Erlan Turǵymbaevtyń buıryǵymen 2020 jyl – ýchaskelik polıtsııa ınspektorlarynyń jyly bolyp jarııalandy. Prezıdent Qasym-Jomart Toqaev ta halyqqa arnaǵan bıylǵy joldaýynda ýchaskelik ınspektorlardyń mártebesin arttyrý qajettigin aıtyp ketti. Materıaldyq-tehnıkalyq jabdyqtalýymyz jaqsaryp keledi. Qazir birden málimetter bazasyna kirýge múmkindik beretin elektrondy planshetterimiz bar. Buǵan deıin ýchaskelik polıtsııa qyzmetkerleri mundaı aqparatty telefon arqyly alǵan. Endi qylmyskerdiń JSN engizý jetkilikti, ekranda qajetti aqparat paıda bolady. Hattamalardy óńdeý ýaqyty aıtarlyqtaı qysqardy», - deıdi ýchaskelik ınspektor.
Táýelsizdiktiń qurdasy – tártip saqshysy Rınat Omarov bul mamandyqty tańdaǵanyna ókingen emes.
«Bizdiń qyzmette kúndelikti neshe túrli oqıǵalar bolyp jatady. Ár sátte kútpegen jaǵdaıǵa daıyn bolýymyz kerek. Táýelsizdiktiń qurdasymyn degen oı - kóp nársege mindetteıdi. Ár iske jaýapkershilikpen qaraý meniń qatarlastaryma ana sútimen daryǵan dep bilemin. Men barsha qazaqstandyqtardy basty memlekettik merekemen quttyqtaımyn. Elimiz tynysh, jurtymyz aman bolsyn», - deıdi ýchaskelik polıtsııa ınspektory Rınat Omarov.
