Táýelsizdik qurdastary arasynda qazaq tilin bilýden baıqaý ótti - Aqmola oblysy

KÓKShETAÝ. QazAqparat - Aqmola oblysynda Qazaqstan Respýblıkasy Táýelsizdiginiń 30 jyldyǵyna oraı memlekettik tildi keńinen nasıhattap júrgen táýelsizdik qurdastary arasynda «Táýelsizdik barysy» atty oblystyq onlaın baıqaýy ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Vedomstvonyń málimetinshe, sharaǵa oblystyń aýdandary men qalalarynan 1991 jyly týǵan jastar, ıaǵnı 30 jastaǵy 13 úmitker qatysty. Baıqaý memlekettik tildiń qoldaný aıasyn keńeıtý, jastar arasynda qazaq tilin bilý deńgeıin kóterý, yqylasy men qyzyǵýshylyǵyn arttyrý maqsatynda ótkizildi. Qatysýshylar ózderin tanystyryp, jetken jetistikteri týraly beınerolık daıyndady. Saıystyń sońǵy kezeńinde olar bolashaqtaǵy maqsat-josparlarymen bólisti.

«Elimiz Táýelsizdik alǵan jyly týǵan ul-qyzdar, búgingi kúni ár salanyń qyr-syryn meńgergen maman ıeleri ekenin túsindim. Búgingi baıqaýǵa qatysqan Táýelsizdik qurdastarynyń ishinde aqyn da bar ánshi de bar, muǵalim de, ákim de, polıtsııa qyzmetkeri de bar eken. Úmitkerlerdiń barlyǵy ónerli, al jetken jetistikteriniń ózi bir tóbe. Táýelsiz elimizde osyndaı bilimdi de, talantty jastardy kórgende qýanyshymda shek bolmaıdy», - dep atap ótti qazylar alqasynyń múshesi Aqmola oblysynyń bilim basqarmasy janyndaǵy oblystyq oqý ádistemelik kabınetiniń ádiskeri Juldyz Ábilqaıyrova.

Baıqaý qorytyndysy boıynsha birinshi orynǵa Kókshetaý qalasynan Farıza Asylbekova laıyqty dep tanylsa, ekinshi oryndy Ereımentaý aýdanynan Erlan Dáýletuly, úshinshi oryndy Jaqsy aýdanynan Quralaı Qudaıbergenova ıelendi. Saıys jeńimpazdary men qatysýshylary dıplomdar, alǵys hattar jáne baǵaly syılyqtarmen marapattaldy.

Aıta keteıik, óńirde el Táýelsizdiginiń 30 jyldyq mereıtoıyna arnalǵan 12000-nan astam sharalar ótkizildi